1-mavzu. Avtotransport korxonalari fanining mazmuni, maqsadi va vazifalari

«ATK iqtisodiyoti» xuddi boshqa fanlar kabi birinchi o‘rinda o‘rganish funksiyasini bajaradi. Uning mahsulot ishlab chiqarish moddiy-texnika resurslarini sarf qilishni talab qilishi bilan, xodimlar mehnati ularga haq to‘lash va rag‘batlantirishning boshqa shakllari bilan, daromad hajmi esa xarajatlar miqdori va bahoni shakllantirish bilan bog‘liq bo‘lgan korxonalarda sodir etiluvchi hodisa va jarayonlarni o‘rganishi va izohlashiga mo‘ljallangan. Bunda gap qandaydir omillarni oddiy tarzda konstatatsiya qilish haqidagina emas, balki korxonalar iqtisodiy hayotining mohiyatini anglash, ularning iqtisodiy ahvolini yaxshilash yo‘llarini tanlash, baholash va tahlil qilish, eng muhim iqtisodiy jarayonlarni prognozlashtirish va modellashtirish haqida ham boradi.
Mazkur fanning tadqiqotlari ob’ekti turli mulk shaklidagi avtotransport korxonalari hisoblanadi. Ishlab chiqarilayotgan mahsulotlar yoki ko‘rsatilayotgan xizmatlarning yuqori sifat ko‘rsatkichlarini saqlagan holda xarajatlarni minimallashtirish va daromad(foyda)ni maksimallashtirish deyarli har bir korxonaning asosiy vazifasi hisoblanadi.
Fanning predmeti bozor munosabatlari sharoitlarida avtotransport korxonalari faoliyatining nazariy va amaliy asoslarini, ular faoliyatida iqtisodiy qonuniyatlarning namoyon bo‘lishini, shuningdek, ularning ishlab chiqarish va xo‘jalik faoliyati samaradorligini reurslardan oqilona foydalanish, ratsional boshqaruv, investitsion va tadbirkorlik faolligi asosida oshirish yo‘llarini aniqlash bilan ifodalanadi.