1-mavzu. Avtotransport korxonalari fanining mazmuni, maqsadi va vazifalari

Mazkur ma’ruza matnining maqsadi - talabalarga barcha iqtisodiy masalalar yechimini topish, kelajakda iqtisodiy bilimlar olish uchun o‘ziga xos poydevor bo‘lib xizmat qiluvchi tarmoq korxonalari iqtisodiyoti asoslarini o‘rganishga ko‘maklashishdir.
Mustaqilligimizning dastlabki yillaridanoq belgilab olingan islohotlar strategiyasi, uning pirovard maqsadi, ya’ni ijtimoiy yo‘naltirilgan bozor munosabatlariga asoslanuvchi, erkin, demokratik fuqarolik jamiyatini qurish va shu asosda xalqimizning farovonligini ta’minlash borasida amalga oshirilgan ishlar o‘zining beqiyos samarasini bermoqda. Biroq, bu islohotlar hali davom etmoqda. Ayni paytda, jahonni larzaga solgan, ko‘plab mamlakatlar iqtisodiyotiga katta talofatlar yetkazib, izdan chiqargan global moliyaviy-iqtisodiy inqiroz jarayonlarining murakkab va og‘ir sinovlaridan o‘tayotgan mamlakatimizning o‘ziga xos taraqqiyot yo‘li islohotlarni davom ettirish va chuqurlashtirish orqali yanada samarali va mustahkam bo‘lib bormoqda.
Iqtisodiyot inson hayotining moddiy, ma’naviy, fiziologik va boshqa ehtiyojlari bilan bog‘liq bo‘lgan har bir jabhasini qamrab oladi. Oila qurish, kelajak avlodni tarbiyalash, zaruriy turmush tarzini ta’minlash uchun odamlarga oziq-ovqat, kiyim-bosh, turarjoy va boshqa vositalar kerak bo‘ladi. Bu predmetlar, qoidaga ko‘ra, iqtisodiyotning turli tarmoqlaridagi korxonalarda ishlab chiqariladi. Shu sababli iqtisodiyotning, ayniqsa, avvalgi ma’muriy-buyruqbozlik tizimidagi rejali iqtisodiyotdan farq qiluvchi bozor iqtisodiyotining rivojlanish tendensiyalari va qonunlarini bilish, ro‘y berayotgan ijtimoiy-iqtisodiy jarayonlarni tushunish va istalgan xo‘jalik muammolarini hal qilishda muhim shart hisoblanadi.