1-masalaning bayoni

 (Kadrlar tayyorlash milliy dasturidan).

Farzandlari kelajagini o‘ylash, ajdodlar ruhi, avlodlar istiqboli oldida  mas’uliyat hissi bilan yashash xalqimizga xos fazilat. Bu fazilat zamiridagi ezgulik istiqlolga erishganimizdan so‘ng yanada qadr topdi, amaliy ijrosini ko‘rdi. Shu bois ta’lim  tizimida olib borilayotgan islohotlar dunyo hamjamiyati tomonidan ham yuqori baholanmoqda.

Mustaqil O‘zbekistonning birinchi Prezidenti Islom Karimov tashabbusi bilan Toshkentda 2012 yil 16-17 fevral kunlari xalqaro hamjamiyatni O‘zbekistonda ta’lim sohasida amalga oshirilayotgan islohotlar samaralari, yuksak bilimli hamda intellektual rivojlangan avlodni tarbiyalashda davlatning roli  va bu borada to‘plangan tajriba  bilan keng tanishtirish maqsadida “Yuksak bilimli va intellektual rivojlangan avlodni tarbiyalash — mamlakatni barqaror taraqqiy ettirish va modernizatsiya qilishning eng muhim sharti” mavzuida  o‘tkazilgan xalqaro konferensiya tahlillari ham ushbu fikrlarning yorqin isbotidiryu

Xalqaro konferensiyada qariyb 1000 nafar ishtirokchi, jumladan, dunyoning 48 davlatidan, 8 xalqaro tashkilot va ta’lim jamg‘armalaridan 270 nafar vakil ishtirok etdi. Ushbu nufuzli forumda BMT Bosh kotibining o‘rinbosari, Osiyo taraqqiyot banki prezidenti, Islom taraqqiyot banki prezidenti, qator xorijiy mamlakatlardan vazirlar, sohaga tegishli qo‘mitalar rahbarlari va parlamentlar deputatlari qatnashdi.
Mustaqil O‘zbekistonning birinchi Prezidenti Islom Karimovning O‘zbekistonda Ta’lim sohasini isloh qilish, yuksak bilimli va intellektual rivojlangan avlodni tarbiyalash bo‘yicha amalga oshirilayotgan dasturning asosiy maqsad va vazifalari, mazmun-mohiyati qisqacha bayon etilgan nutqi xalqaro konferensiya ishida muhim  ahamiyat kasb etdi. Konferensiyada ta’lim sohasida faoliyat yuritayotgan taniqli mutaxassislar hamda ekspertlar ishtirok etib, mamlakatimizda ta’lim tizimidagi islohotlarni doimo katta qiziqish bilan kuzatib borishini, farzand tarbiyasidek o‘ta nozik masalaga davlat siyosati darajasida e’tibor qaratilib, yildan-yilga ulkan yutuqlarga erishilayotganligini ta’kidlagan edi.

Jumladan, Lissabon universiteti prorektori (Portugaliya) Luiza Serdeyra “Xalq so‘zi” gazetasiga bergan intervyusida shunday degan edi: “Ochig‘ini aytish kerak, bugungi moliyaviy-iqtisodiy inqiroz sharoitida ko‘plab rivojlangan mamlakatlarda ham ta’limga sarmoya ajratish, uni modernizatsiya qilish kabi masalalar e’tibordan chetda qolmoqda. Ana shunday murakkab vaziyatda yurtingizda Birinchi Prezidenti Islom Karimov tomonidan navqiron avlodning ta’lim-tarbiyasi, ularning jamiyatda o‘z o‘rnini topishlari uchun katta g‘amxo‘rlik ko‘rsatilayotgani tahsinga sazovor”.          CNN kompaniyasining AQSH, O‘zbekiston va jahonning boshqa davlatlarida ta’limning holati to‘g‘risida e’lon qilingan qiyosiy axboroti asosida Fransiyaning nufuzli “Insead” xalqaro biznes maktabi va Jahon intellektual mulk tashkiloti (JIMT) tomonidan tayyorlanib, e’lon qilingan “2012 yildagi innovatsiyalarning global indeksi” deb nomlangan tahliliy ma’ruzasiga ko‘ra, ta’lim sohasidagi innovatsiyalar ko‘rsatkichi bo‘yicha O‘zbekiston ushbu reytinglar ro‘yxatida 75,38 ball bilan dunyoda ikkinchi o‘rinni egallagan. Birinchi o‘rinni esa 75,70 ball bilan Irlandiya band etgan. Daniya, Yangi Zelandiya, Islandiya, Belgiya singari bir guruh rivojlangan Yevropa va boshqa qit’a mamlakatlari ushbu ro‘yxatning keyingi o‘rinlaridan joy olgan.

Darhaqiqat, mamlakatimizda ta’lim tizimining barcha bo‘g‘inlarini zamonoviy talablarda modernizatsiya qilish masalasiga davlat siyosati darajasida etibor qaratilmoqda. Jumladan, mamlakatimiz rahbarining 2012 yil 10 dekabrdagi “Chet tillarni o‘rganish tizimini yanada takomillashtirish chora-tadbirlari to‘g‘risida” gi PQ -1875 sonli Qarori,  2013 yil 23 maydagi “O‘zbekiston davlat jahon tillari universitetining faoliyatini takomillashtirish chora-tadbirlari to‘g‘risida”gi Qarorida “Ta’lim to‘g‘risida”gi qonun hamda “Kadrlar tayyorlash milliy dasturi”ni amalga oshirish doirasida mamlakatimiz ta’lim tizimida chet tillarni o‘qitishning kompleks tizimini yo‘lga qo‘yish, ya’ni zamonaviy fikrlovchi yosh avlodni shakllantirish masalalariga ustuvor vazifa qilib belgilangan.

Xulosa qilib aytganda, maktab-maorif, ta’lim-tarbiya ishi chin ma’noda umummilliy harakatga aylangan, farzandlari tinchlik va farovonlikda, zamonaviy ilm maskanlarida voyaga yetayotgan mamlakatning kelajagi buyuk bo‘lishiga shubha yo‘q.