1-маъруза: Электр энергияси манбалари. Анъанавий ва ноанъанавий энергия манбалари

1-маъруза: Электр энергияси манбалари. Анъанавий ва ноанъанавий энергия манбалари.

Режа:

1. 
   Электр энергияси манбалари.
   
2. 
   Электр таъминоти манбаларининг телекоммуникация соҳасининг ривожланишидаги тутган ўрни.
   
3. 
   Электр таъминоти манбаларининг ривожланиш истиқболлари.
   
4. 
   Қуёш элементлари асосидаги электр таъминоти манбалари.
   
5. 
   Кимёвий электр энергияси манбалари.
   

Таянч иборалар: электр энергия манбалари, энергия тизими, гальваник элементлар, қуёш батареялари, қуёш нурланиши, фотоэлектрик элементлар, кимёвий энергия манбалари.


Электр энергияси манбалари


Электр энергия манбалари бирламчи (БТЭМ) ва иккиламчи электр таъминоти манбаларига (ИЭТМ) бўлинади.
БЭТМларга ҳар хил турдаги энергияларни (механик, иссиқлик, кимёвий, қуёш ва ҳ.к.) бевосита электр энергиясига айлантирувчи ўзгартиргичлар киради, яъни электромашина генераторлари, гальваник элементлар, қуёш батареялари ва ҳ.к.
ИЭТМларга бир турдаги электр энергияни иккинчи турдаги электр энергиясига айлантириб берувчи ўзгартиргичлар (трансформаторлар, тўғрилагичлар, стабилизаторлар, ИЭТМлар ва ҳ.к.) киради.
Алоқа корхоналарининг электр таъминоти асосан энергия тизими ёки маҳаллий электростанция орқали амалга оширилади [1]. Алоқа корхоналари аппаратураларининг электр таъминоти турли электр таъминотини амалга оширувчи иншоатлар мажмуаси бўлган электр қурилма орқали амалга оширилади. Корхона электр қурилмаси таркибига трансформатор подстанцияси ва электр таъминот тизими киради.
Электр энергияси таъминоти тизими бу ўзаро электр тармоқ линиялари орқали бир-бирлари билан боғланган, электростанциялар, подстанциялар ва электр энергия қабуллагичлари мажмуалари тўпламидир.


1.1-расм. Электр энергияси тизимининг тузилиш схемаси
Электр энергияси тизимининг тузилиш схемасидан кўриниб турибдики, электростанцияда генератор ишлаб чиқараётган электр энергияси ТV1 трансформатор ёрдамида 6 кВли кучланишдан 35 кВли кучланишгача орттирилади ва электр узатиш линияси орқали ТV2 тақсимловчи подстанцияга берилади. Бу трансформатор орқали 35 кВли кучланиш 6 кВли кучланишгача пасайтирилади ва истеъмолчининг (алоқа корхонасининг) ТV3 трансформаторларига узатилади. ТV3 трансформатор ёрдамида 6 кВли кучланиш истъемолчи учун зарур бўлган 380/220, 220/127 Вли кучланишларга айлантирилади. Кўриниб турибдики, электр энергияси истеъмолчига етиб келгунча уч маротаба ўзгартирилмоқда. Амалиётда ўзгартиришлар сони бундан ҳам кўп бўлиши мумкин.