1. Ilmiy ishlarning tuzilmaviy xususiyatlari Ilmiy matnni rasmiylashtirish qoidalari Havolalarni berish tartibi va namunalari

Ilovalar – bu qo‘shimcha izoh bo‘lib, asosiy materialni to‘ldirishga yoki uni tasvirlashga xizmat qiladi. Ilovalar tarkibiga jadvallar, sxemalar, rasmlar, xaritalar, ko‘shimchalar, lug‘atlar, ro‘yxatlar, tasvirlar va boshqalar kiradi. Alohida masalalar bo‘yicha ilovalar matnning tegishli qismlarida, ishning umumiy mazmuniga yoki uning alohida bo‘limlariga oid ilovalar ish oxirida joylashtiriladi. Barcha ilovalar jamlangan va raqamlangan bo‘ladi.
Shartli belgilar ko‘rsatish uchun xizmat qiluvchi yozuv, strelka, biror narsaning rivoji, darajasi, ishning borishi yo‘nalishini bildirish uchun muayyan asar tuzilmasidagina qo‘llanadigan shartli belgilardir. Masalan, maktab darsliklarida qoida-ta’riflar, mashq-topshiriqlar, savol-javoblar, uy vazifalari, adabiy o‘qish materiallari uchun alohida shartli belgilar qabul qilingan bo‘ladi. Ular haqida darslik rubrikasida ma’lumot berilgan bo‘ladi.
Qisqartmalar – so‘zning qismini yoki o‘zini to‘liqligicha qisqartirib berish shaklidir. Qisqartmalarning 2 xil turi bor: me’yoriy hujjatlarda keltirilgan ommalashgan qisqartmalar va mazkur tadqiqot ishida muallif tomonidan qo‘llanib, tavsiya etilgan qisqartmalar. Mualliflik qisqartmalari dastlab ishda to‘liq shaklda beriladi va qavs ichida keyingi o‘rinlarda qisqartirib berilish shakli qayd qilib o‘tilgandan so‘nggina qo‘llanilishi mumkin.
Illyustratsiyalar – matndagi tasvir, rasmlar. Ularning jadval, diagramma, grafik, sxema, fotosurat, chizma, xarita shaklidagi izoh turlari mavjud bo‘lib, ilmiy ishning mazmunini tushuntirib berishga xizmat qiladi. Ular ketma-ketlikda raqamlab beriladi. Raqamli belgilar ilmiy axborotda raqam, so‘z raqam, algebraik shakllarda berilishi mumkin.
Adabiyotlar ro‘yxati (bibliografiya) – ilmiy ishda yoki o‘quv adabiyotida foydalanilgan asarlar ro‘yxatini, shuningdek, ushbu fan bo‘yicha o‘rganishga tavsiya etilgan asarlar, tadqiqot ishlari ro‘yxatini o‘z ichiga olgan bo‘limdir. Adabiyotlar asosiy va qo‘shimcha adabitlar qismlariga bo‘linadi va ishning oxirida maxsus ro‘yxat ko‘rinishida beriladi. Qo‘shimcha adabiyotlar fan mazmuni va o‘quvchilar yoshini hisobga olgan holda tanlanadi.