1. Ijtimoiy pedagogika, uning predmeti va vazifalari. Ijtimoiy pedagogikaning fan sifatida rivojlanishi

3.Ijtimoiy pedagogika tamoyillarining mohiyat va mazmuni.
“Tamoyil” (tamoyil) atamasi lotincha so‘zdan kelib chiqqan bo‘lib, “asos”, “negiz” degan ma’noni anglatadi.
Har bir fan o‘z rivojlanish jarayonida muayyan tamoyillarga, ya’ni fan aniqlagan qonuniyatlardan kelib chiquvchi asosiy qoidalarga asoslanadi. Masalan, quruvchilar har qanday bino qurilishi uning poydevorini o‘rnatishdan boshlanishini yaxshi biladilar.
Har qanday fan o‘z tamoyillariga ega bo‘lib, ularni amalga oshirish muayyan qoidalarga bo‘ysunadi. Ijtimoiy pedagogika, yuqorida qayd etib o‘tilganidek, pedagogikadan ajralib chiqqan va tabiiyki, u asosan ayni shu fanning tamoyillariga tayanadi. Pedagogika tamoyillari, jamiyatning rivojlanish darajasi va uning ehtiyojlarini aks ettirgan holda, umuman olganda jamiyatda muayyan tipdagi shaxsga qo‘yiladigan talablarni ifodalaydi: tarbiya strategiyasi, maqsadlari, mazmuni va metodlarini belgilaydi. Pedagogikada tamoyillar shaxsga ta’lim va tarbiya berishning umumiy yo‘nalishini ko‘rsatadi va konkret pedagogik vazifalarni yechish uchun asos bo‘lib xizmat qiladi.
Ijtimoiy tarbiyani bola kamol topishi va ijtimoiylashuvining tarkibiy qismi sifatida tushunish milliy va xorijiy pedagogika amaliyoti sinovidan o‘tgan ayrim tamoyillarni ajratish imkoniyatini beradi.
Biz bu yerda uch tamoyil - tabiatga muvofiqlik, madaniyatga muvofiqlik va insonparvarlik tamoyillariga batafsilroq to‘xtalamiz. Bu tamoyillarning har biri ijtimoiy pedagogikada o‘z xususiyatlariga ega va ijtimoiy-pedagogik faoliyatda aks etadi.

Tabiatga muvofiqlik tamoyilini ilk bor Ya.A.Komenskiy (1592-1670), (2.1-rasm) o‘zining “Buyuk didaktika” asarida ta’riflagan. U inson tabiatning bir qismi sifatida uning o‘simliklar va hayvonlar dunyosida ham, kishilik jamiyatida ham amal qiluvchi umumiy qonunlariga e’tiborini qaratadi.