Kannabis o‘simligini yetishtirishda litsenziatga qo‘yiladigan qo‘shimcha talablar: t) kannabis o‘simligini yetishtirish uchun litsenziat:
irrigatsiya infratuzilmasini yangilashi va resurs tejaydigan texnologiyalarni joriy etishi;
litsenziyalovchi organ vakiliga yoki jalb etilgan ekspertlarga, bayon etilgan kannabis o‘simligi navining belgilangan me’yorlarga muvofiqligini va vegetatsiya davrining turli bosqichlarida tarkibidagi TGK miqdorini aniqlash maqsadida namunalar olishi uchun kannabis o‘simligi yetishtirilayotgan ekin maydoniga kirib borishiga imkoniyat yaratishi;
tungi paytda ekin maydonlari konturlari to‘liq ko‘rinib turishi uchun yoritish moslamalari bilan jihozlashi;
litsenziyalovchi organ tomonidan namunalar olinishi hamda tarkibidagi TGK miqdori tekshiruvi o‘tkazilgunga qadar kannabis o‘simligi hosilini yig‘ib olishga yo‘l qo‘yilmasligi;
kannabis o‘simligining yangi sanoat navlarini sinash tajribasini faqat yopiq inshootlarda o‘tkazishi;
kannabis o‘simligi yetishtirishni boshlagunga qadar ishlab chiqarishning texnologik reglamentini tasdiqlashi shart;
u) kannabis o‘simligi hosilining bitta partiyasidan olingan namunalar ushbu o‘simlik hosilining boshqa partiyasidan olingan namunalar bilan aralashtirilmasligi zarur.
Kannabis o‘simligini va uni qayta ishlash mahsulotlarini saqlash va realizatsiya qilish (berish)da litsenziatga qo‘yiladigan qo‘shimcha talablar: f) ishlab chiqarish korxonalarida kannabis o‘simligi hosilini saqlash alohida jihozlangan omborxonalarda (keyingi o‘rinlarda — omborxonalar) amalga oshiriladi;
ish vaqtidan tashqari paytlarda binolar qulflangan, muhrlangan hamda qo‘riqlash uchun topshirilgan bo‘lishi va unga olib boruvchi yo‘llar kechki paytda yoritilgan bo‘lishi kerak.
x) omborxonani jihozlash bo‘yicha eng kam talablar quyidagilardan iborat:
omborxona atrofi bo‘ylab kamida 3 metr balandlikda 2 “egoza” turidagi tikonli sim bilan o‘ralgan bo‘lishi hamda qulflanadigan darvozaga ega bo‘lishi;
omborxona darvozasi qulflangan va muhrlangan holatda, kaliti �a muhri esa moddiy javobgar shaxsda bo‘lishi;
qo‘riqlash va yong‘in signalizatsiyasiga, shuningdek, videokuzatuv tizimiga ega bo‘lishi;
umumiy aylanmali shamollatish tizimiga ega bo‘lishi lozim;
ts) kannabis o‘simligi hosili omborxonalarga olib kelinganda korxona rahbari yoki vakolatli shaxs uning miqdori kuzatuv hujjatlariga mosligini tekshirishi shart;
ch) kannabis o‘simligini va uning qayta ishlash mahsulotlarini saqlash uchun korxona rahbari yoki korxona rahbarining buyrug‘i bilan javobgar shaxs tayinlanadi;
sh) kannabis o‘simligini va uning qayta ishlash mahsulotlarini saqlash yong‘in xavfsizligi qoidalariga rioya etgan holda ekologik, qurilish, sanitariya-gigiyena va fitosanitar talablarga muvofiq amalga oshiriladi;
e) ishlab chiqarish inshootlari devorlari, yuk ko‘taruvchi qurilmalarning tashqi tarafini tozalash va zararsizlantirish uchun ochiq holda bo‘lishi kerak.
Omborxonalarning tomi va devorlari, shamollatish tizimlari teshiklari himoyalangan hamda ularga yomg‘ir va begona predmetlarning tushishini oldi olingan bo‘lishi lozim.
Omborxonalarda saqlanayotgan kannabis o‘simligi hosili qayta ishlangunga qadar xavfsiz va barqaror saqlanishi uchun quritish va zararsizlantirishning texnologik jarayoni bilan ta’minlangan bo‘lishi lozim;
yu) omborxonalarda quyidagilar taqiqlanadi:
kannabis o‘simligi va uning qayta ishlash mahsulotlari bilan birga zaharli va yonuvchi kimyoviy vositalar, neft mahsulotlari, shuningdek, kannabis o‘simligi va uning qayta ishlash mahsulotlarining ifloslanishiga olib keluvchi boshqa turdagi oziq-ovqat va nooziq-ovqat iste’mol tovarlarini saqlash;
ichki yonuvchi dvigatellarga ega bo‘lgan mashinalarni ishlatish;
ya) kannabis o‘simligini va uning qayta ishlash mahsulotlarini ishlab chiqarish bo‘limiga (sexiga) o‘tkazish ishlab chiqarishning kunlik ehtiyojiga muvofiq korxona rahbari yoki uning o‘rinbosarining imzosi va muhr bilan tasdiqlangan ruxsatnoma asosida amalga oshiriladi.