1. Фаннинг ҳалқ хўжалигидаги ўрни ва ўрганиш соҳалари. Фаннинг мақсади, вазифалари ва структураси

«Машиналар ишончлилиги ва таъмиирлаш» фанидаги асосий тушунча ва атамалар
Ишончлиликнинг асосий тушунчалари (атамалари) давлат стандарти томонидан белгиланади ва уларни ҳамма хужжатларда қўлланилиши талаб этилади. Қишлоқ хўжалик техникаларига оид ишончлиликнинг умумий тушунчалари ГОСТ 27.002-83 билан белгиланади.
Пухталик – машинанинг белгиланган режимларга ва ишлатиш, техник хизмат кўрсатиш, таъмирлаш, ташиш шароитларига мос келадиган берилган чегараларда белгиланган вақт ичида эксплатацион кўрсаткичлар қийматларини сақлагани ҳолда берилган вазифаларни бажариш хусусияти.
Ишончлилик – комплекс хусусият бўлиб, машина ва унинг қисмларининг бўзилмай ишлаш, чидамлилик, таъмирлашга яроқлилик ва сақланувчанлик каби хоссаларнинг ҳар бирини алоҳида ёки бир йўла бир нечтасини ўз ичига олиши мумкин.
Ишламай қолиш (отказ) – машинанинг ишлаш қобилиятининг бузилишидан иборат бўлган ҳодиса.
Бузилмасдан ишлаш – машинанинг бирор вақт ичида ёки қандайдир ҳажмдаги ишни бажаргунга қадар ўзининг ишлаш қобилиятини мажбурий танаффусларсиз сақлаш хусусияти.
Чидамлилик (узоқ хизмат қилиш) – машина, агрегат, узел, туташманинг ўзининг ишлаш қобилиятини охирги ҳолатгача сақлаш хусусияти. Охирги ҳолат машинани техник хизмат кўрсатмасдан ёки таъмирламасдан туриб, ундан фойдаланиш мумкин эмаслиги билан белгиланади. Охирги ҳолат техник хужжатларда изоҳланади.
Таъмирлашга яроқлилик (таъмирбоплилик) – машина (агрегат, узел) нинг машинанинг хизмат кўрсатиш (таъмирлаш) йўли билан ишламай қолиши ҳамда нуқсонларининг олдини олиш, аниқлаш ва бартараф этишга мослашганлигидан иборат хусусияти.
Сақланувчанлик – машина (буюм) нинг ўз иш кўрсаткичларини сақлаш ва сақланиш муддати давомида ва бу муддат тугугандан кейин ҳам техник хужжатларда кўрсатилган қийматларда сақлаб қолиш хусусиятлари.
Бажарган иши – объектнинг ишлаш давомийлиги ёки ҳажми. Агар объект (машина, агрегат, узел) танаффуслар билан ишлайдиган бўлса, у ҳолда жами бажарган иши ҳисобга олинади. Бажарган иш вақт, узунлик, майдон (гектар), ҳажм, масса ва бошқа бирликларда ўлчаниши мумкин.