1-amaliy mashg’ulot Operatsiyalarni izchil (ketma-ket) jamlash Ishdan maqsad

Ishlab chiqarish sikli vaqtini taqsimlash. Ishlab chiqarish sikli o’z ichiga texnologiya va transport operatsiyalari, texnik nazorat, ishdagi tanaffuslar, ishlanmaydigan smenalar va operatsiyalar orasidagi kutish davrini qamrab oladi.
Ishlab chiqarish sikli T davomiyligini umumiy ko’rinishda quyidagicha belgilash mumkin:
T_ts=t_tex+t_tr+t_k+t_est+t_p+t_pr
bu yerda t_tex - texnologik operatsiyalar vaqti;
t_tr - transport operatsiyalari vaqti;
t_k - texnik nazorat vaqti;
t_est- tabiiy jarayonlar vaqti (teplovoz agregatlari bo’yalganidan so’ng ularni quritish, isitish, sovutish va h.k.);
t_p - tanaffuslar, smenalararo va smenalar ichki operatsiyalararo o’tadigan vaqti;
t_pr - yarim fabrikatlarning sexlararo omborlarda bo’lish vaqti.
Agar transport operatsiyalarini nazorat qilish vaqti operatsiyalararo vaqt ichida qolsa (undan oz bo’lsa), u ishlab chiqarish siklini hisob-kitob qilishda hisobga olinmaydi. Ishlab chiqarish sikli davomiyligining qisqarishi mahsulot ishlab chiqarishni tezlashtirib, oborot mablag’lari aylanuvchanligini oshiradi, tugallanmagan ishlab chiqarishni kamaytirib, ishlab chiqarish maydonlaridan foydalanishni yaxshilaydi. Sikl davomiyligini texnika va texnologiyani takomillashtirish, ishlab chiqarishni tashkil etish darajasini yuksaltirish orqali qisqartirish mumkin bo’ladi. Texnika va texnologiyani takomillashtirish ishlab chiqarish siklining barcha elementlariga, ayniqsa texnologiya operatsiyalari va tabiiy jarayonlar vaqti qisqarishiga jiddiy ta’sir ko’rsatadi. Ishlab chiqarishni tashkil etish darajasining oshishi ishdagi tanaffuslarni kamaytiradi. Ishlab chiqarish sikli vaqtini qisqartirishda texnologiya jarayonining turli bosqichlarida mahsulotning bir vaqtda tayyorlanish darajasi jiddiy ahamiyatga ega. Ishlab chiqarish siklining davomiyligi operatsiyalar birikmasi turi va detallarni bir ish joyidan boshqasiga uzatish tartibi bilan belgilanadi.