Reja: Ikki yo'l

Esse

Hayot go'zal-hayotga qo'shil!

Reja:

1.Ikki yo'l

2.Munosib javob

3.Hayot go'zal-hayotga qo'shil

Yo'llar senga kelsa-da malol,

Uchrasa-da ne-ne to'siqlar,

Taqdiringni o'z qo'lingga ol,

Seni kutar ulkan yutuqlar.

U. Xenli

"Hayot"deb atalmish so'qmoqda ikki yo'l bor. Birinchisi–mashaqqatlar, kurashlar bilan to'la yo'l. Ikkinchisi esa –"osoyishta ko'lmak". "Siz qaysi yo'ldan yurgan bo'lardingiz?"–deb so'rashsa, hech ikkilanmay "Birinchi yo'ldan",–deb javob bergan bo'lardim. Negaki, osonlikcha baxtga erishib bo'lmaydi. "Tekin pishloq faqat qopqonda bor",–degan hikmatli iborani eshitganman. Sog'lom turmush tarzini tanlab, har tomonlama yetuk bo'lib voyaga yetish ham yoki aksincha, kelajagi yo'q, boshi berk ko'chada adashib yurish ham – o'zimizga bog'liq. Sog'lom turmush tarzini tanlagan oila farzandlari bilimli, salohiyatli bo'lib ulg'ayadilar. Ruhiyati musaffo, tani sog', odob-axloqi barchaga ibrat bo'lib kamolga yetayotgan bolani– sog'lom bola deyishimiz mumkin. Onajonim: "Omad kamtar, zukko va albatta, o'z oldiga yuksak maqsadlarni qo'yib, bu yo'lda og'ishmay mehnat qiladigan insonlarga kulib boqadi",–deydilar. Shunday ekan do'stlar biz hayotdagi o'zgarishlarga befarq bo'lmagan holda o'z oldimizga bir maqsad qo'yib shu maqsadimiz yo'lidagi qiyinchiliklardan qo'rqmasligimiz zarur. Bilasizmi, aziz do'stlar, bizni maktabda a'lo baholarga o'qishimiz, kelgusida yurtimizga, xalqimizga nafi tegadigan bo'lib ulg'ayishimiz uchun kitob albatta, eng yaxshi ko'makchi va be'minnat maslahatchidir. Bejizga "Kitob – bilimlar bulog'i" ga mengzalmaydi. Buyuk sarkarda Amir Temur bobomiz ham kitobni barcha bunyodkorlik, yaratuvchanlik va aql-idrokning, ilmu donishning asosi ekanligini, hatto, kitob hayotni o'rgatuvchi murabbiyligini aytib o'tganlar. Darhaqiqat, kitob kirmagan, o'qilmaydigan uyda fikrlar sayoz, dunyoqarash tor, muammolar ko'p va yechimsiz bo'ladi.