Qishda maktablarning ahvoli qanday?

“Qishda maktablarning ahvoli qanday?”

Bugungi kunda eng rivojlangan ilg’or davlatlar tarixiga nazar tashlaydigan bo’lsak, ularning bunday yuksak natijalarga erishishida ta’lim tizimiga berilgan e’tiborning ahamiyati katta ekanligiga guvoh bo’lamiz. Haqiqatdan ham, har bir davlatning kelajagi har tomonlama rivojlangan, sog’lom va bilimli yoshlarga bog’liq. Shuning uchun ham hozirgi kunda yurtimizda ta’lim-tarbiyaga bo’lgan e’tibor kuchayib bormoqda,maktabgacha ta’lim muassasalari, maktablar , oliy ta’lim muassasalarining moddiy texnik bazalari mustahkamlanib, qurilish-ta’mirlash ishlari olib borilmoqda.

Xorazm viloyati Urganch shahidagi 28-son maktabda ham qurilish-ta’mirlash ishlari olib borilib, o’quvchilarning yilning to’rt faslida ham qiyinchiliklarsiz bilim olishlariga sharoit yaratildi. Isitish tizimidagi ta’mirlash ishlari kuz faslidayoq qishning izg’irinli kunlariga tayyor holga keltirildi. Ayniqsa, 2020-yil noyabr oyigacha qurib bitkazilgan boshlang’ich sinflar uchun mo’ljallangan yangi to’rt qavatli bino maktab ko’rkiga ko’rk qo’shib turibdi. Barcha sinf xonalari keng va yorug’. Eng asosiysi, qorli va yomg’irli qahraton qishda ham issiqqina xonalar nafaqat o’qituvchilar va o’quvchilar , balki farzandining kelajagi uchun qayg’uradigan ota-onalarning ko’ngliga ham manzur bo’lmoqda. Isitish tizimlarining sifatli va uzluksiz ishlayotganini o’quvchilarning maktab ichkarisida, xonalarda o’zlarini erkin his qilayotganlaridan ham bilib olish mumkin.

Yosh avlodning salomatligini saqlash, mustahkamlash, ularning erkin bilim olishiga shart-sharoit yaratib berish yurtimizning buyuk kelajagi uchun poydevor vazifasini o’taydi. Zero, Prezidentimiz Shavkat Mirziyoyevning “Yangi O’zbekiston” qurish haqidagi fikrlarini aytayotib, ma’rifatparvar bobomiz Fitratning “Bu dunyo kurash maydonidir. Sog’lom tan, o’tkir aql va yaxshi axloq bu maydon qurolidir ”, degan hikmatli so’zini eslatib o’tgani bejizga emas!