Mashinani avtomoykada yuvdirish qimmatlashadi. Ehtimol, juda qimmatlashadi

​​Mashinani avtomoykada yuvdirish qimmatlashadi. Ehtimol, juda qimmatlashadi

Avtomobillarni yuvish shoxobchalar (oddiy qilib aytganda — avtomoykalar)ning aksariyat ishchilari (ko‘rinishidan) noqonuniy ishlasa-da, shoxobchaning o‘zi qonuniy — masalan, soliq to‘laydi. Masalan, suvni qaerdan (quvurdan yo quduqdan) olayotganiga qarab, suvning har kubometri uchun 98,2 so‘mdan 124,8 so‘mgacha pul to‘laydi. Arzimagan pul. Suv-tekin desa ham bo‘ladi. Hozircha.

2018 yil 1 oktyabrdan avtomoykalar ishlatayotgan suv haqi qimmatlashadi — agar shoxobcha mashinalarni yuvish uchun erusti suv manbalari (masalan, quvurlar)dan foydalanayotgan bo‘lsa — bir kubometr suv narxi 1000 so‘m (hozir 98,2 so‘m), agar erosti suv manbalari (masalan, quduqlar)dan foydalanayotgan bo‘lsa — bir kubometr suv narxi 1250 so‘m (hozir 124,8 so‘m).

Suv — O‘zbekistonda bir vaqtning o‘zida ham taqchil, ham qariyb tekin resurs. «Suv-tekin» degan gap ham o‘z-o‘zidan paydo bo‘lmagan. Buni hatto xalqaro ekspertlar ham aytadi: «Sizlarda suvning narxi juda past, suv-tekin — shuning uchun uning qadri ham, uni tejash ham yo‘q», deb. Davlat shu xatoni asta-sekin to‘g‘rilayapti — suvning asl narxini belgilashga kirishyapti.