Linoleum xossasini aniqlash

Laboratoriya ishi №11

Linoleum xossasini aniqlash

Hozirgi vaqtda qurilishda pollarni yopish uchun polimer o’ram va plitka materiallar keng tarqalgan. Bundan tashqari ulardan choksiz yaxlit pollarni yopish uchun foydalaniladi.

Polimer materiallar yog’och va sopol qoplamalardan bir necha marta yengil, ular mustahkam, bioturg’un va gigiena talablariga javob beradi, shuningdek tashqi ko’rinishi chiroyli va suvni kam singdiradi. O’ram materiallardan yopilgan pollar tejamli va qurilishni industriyalash talablariga to’la javob beradi.

Pollar qoplanadigan o’ram materiallar turli sintetik polimerlar asosida to’ldirgichlar, plastifikatorlar va pigmentlar kiritib tayyorlanadi. Ular linoleum va sintetik gilam qoplamalarga bo’linadi. Dastlabki polimer turiga qarab linoleumlar polivinilxlorid, gliftal, kolloksilinli rezina va boshqa linoleumlarga bo’linadi, tuzilishi bo’yicha asosi bo’lmagan va mustahkamlaydigan yoki issiqlik va tovushdan himoyalaydigan asosli, bir qatlamli va ko’p qatlamli, o’ng yuzasining fakturasiga ko’ra silliq, taram-taram va tukli (gilam qoplamalar uchun), yuza rangi bo’yicha bir rangli va ko’p rangli linoleumlarga bo’linadi.

Pollar qoplanadigan polimer o’ram materiallar yeyilishga yaxshi qarshilik ko’rsatadi, suvni kam singdiradi, egiluvchanligi yuqori va boshqa ijobiy xossalarga ega bo’ladi. Linoleumning o’ng yuzasi silliq, yaltiroq yoki yarim yaltiroq, dog’larsiz, tirnalmagan, ezilgan joysiz, kovaksiz va do’ppaygan joylarsiz bo’lishi kerak. Bir xil rangli linoleum butun yuzasi bo’yicha tekis va bir xil tusga ega bo’lishi kerak. Ko’p rangli linoleum chuqur bo’yalgan, ya`ni rasm yeyiladigan qatlamning butun qalinligidan o’tishi, aniq bo’lishi kerak. Linoleum rangi nur, havo va suv ta`siri ostida o’zgarmasligi kerak.

Linolium o’ramlari tik vaziyatda kami bilan 10⁰S harorati quruq xonalarda saqlanadi. Agar linolium pastroq harorat bilan keltirilgan bo’lsa, u xonada 1 kun davomida ochilmasdan saqlanishi kerak. To’shashgan bir necha kun ilgari o’ramlarda saqlanganda hosil bo’lgan to’lqinsimonligini bartaraf qilish uchun linoliumni yoyib qo’yish kerak.

1-rasm. Pоlivinilxlоrid linоleum o’ramlari

Polivinilxlorid linolium mato asosida yoki asossiz (1-rasm) tayyorlanadi. Asosga material qo’yilmagan linolium bir, ikki va ko’p qatlamli bo’lishi mumkin. Bundan tashqari g’ovakli yoki namat asosida issiqlik tovush izolyatsion linolium ishlab chiqariladi.

Polivinilxlorid linolium uzunligi kamida 12 m va eni 1200-1600 mm bo’lgan bir en mato ko’rinishida chiqariladi. Linoliumning qalinligi 1,2-6 mm. Rangi bo’yicha bir rangli (har xil ranglar), marmarsimon va guldor bo’lishi mumkin.

Polivinilxlorid linolium bilan piyodalar oqimi intensiv bo’lgan jamoat va sanoat binolari xonalarining pollari qoplansa maqsadga muvofiq bo’ladi. Namligi yuqori xonalardagi pollarni asosiga mato qo’yib tayyorlangan linolium bilan qoplash tavsiya qilinmaydi.

Linolium (asosi bo’lmagan va mato asosida tayyorlangan) bitum rezina, kumaron kauchukli va boshqa sovuq mastikalar, KN-2, KN-3 yelim va boshqalar yordamida yopishtiriladi (2-rasm). Linoliumni bir butun yopishtirilishini ta`minlash va germetik yopilgan chok yaratish maqsadida polivinilxlorid linoliumning qirralari maxsus asbob bilan payvandlanadi.

2-rasm. Linoliumni sovuq mastikada yopishtirish	3-rasm. Namat asosida tayyorlangan linolium