Лаганга игна билан сурат чизган йигитнинг меҳнатлари тақдирланди

Лаганга игна билан сурат чизган йигитнинг меҳнатлари тақдирланди





Мамлакатимизда амалга оширилаётган кенг кўламли ислоҳотларда фаоллик кўрсатиб, ҳалол ва самарали меҳнати билан Ватанимиз тараққиётини юксалтириш, янги Ўзбекистонни барпо этиш ва унинг халқаро нуфузини оширишга муносиб ҳисса қўшиб келаётган фидойи ва мард ўғлонларимизнинг 29 нафари давлатимиз раҳбари қарорига кўра, «Мард ўғлон» давлат мукофоти билан тақдирланди.
Улар орасида Фарғона давлат университетининг санъатшунослик факультети 2-босқич талабаси Темурбек Ҳайдаров ҳам бор. Айни дақиқаларда Темурбек пойтахтда бўлганлиги сабабли ЎзА мухбири у билан суҳбатлашди.
– Темурбек, энг аввало, юксак мукофот билан табриклаймиз.

– Раҳмат, давлатимиз раҳбарининг биз ёшларга эътиборидан жудаям миннатдорман.
– Бу мукофотни қўлга киритиш кўплаб йигитларнинг орзуси. Албатта, сизнинг ҳам ушбу орзуга эришишингиз осон кечмаган бўлса керак?
– Хоҳ у ёш, хоҳ кекса инсон бўлсин, танлаган соҳаси бўйича қўлга киритган ютуқлари ортида албатта озми-кўпми тўплаган тажрибалари, меҳнатлари заҳмати ва машаққати туради. Кулолчиликни мен 12 ёшимдан бошлаганман. Биринчи марта ўзим мустақил лойдан пиёла ясаб, дадамга кўрсатсам, хурсанд бўлиб кетди.
Дадам Тохиржон Ҳайдаров Риштон туманидаги машҳур кулоллар сирасига киради. Ўзларининг қўл остиларида юзлаб шогирдлари бўлишига қарамасдан мени Одилжон Нигматовга шогирдликка берди. Кулолчилик соҳасида меҳнат қилаётган ижодкор битта йўналишда тўхтаб қолмасдан доимо изланишда бўлиши керак. Шунда яратган асарлари хилма-хил, одамга маънавий озуқа берадиган бўлади. Шу маънода мен кўплаб устозлар қўлида кулолчилик сабоқларини ўргандим. Бу соҳанинг яна бир устаси Шарофиддин Юсуповдан ҳам кулолчиликнинг кўплаб сир-синоатларини ўрганганман.

Уйимизда кутубхона ташкил қилганмиз. 2000 мингдан ортиқ бадиий китоблар тўплами бор. Бу китобларни, энг аввало, ўзимиз ўқиймиз. Чунки мен танлаган соҳа бадиий ижод билан боғлиқ. Фантазияга берилмаган ижодкор қалбида янги ғоя туғилиши қийин. Менинг маҳсулотларимга ғоя эса, албатта, бадиий китоблар орқали туғилади.
– Юртимизда сизга ўхшаган кулолчилик билан шуғулланадиган ҳунармандлар кўп. Айтингчи, сизнинг ижодий ишларингиз айнан қайси жиҳати билан бошқалардан ажралиб туради?
– Риштоннинг тупроғи кулолчиликка мос. Одамларнинг томорқасидан кетмонда кавлаб олинган оддий қизил тупроқни сотиб олиб, майда чиқиндилардан тозалаб, улардан кулолчилик маҳсулотларини яратамиз. Мен ясаган кулолчилик ишларига нина билан ишлов берилади. Кўпроқ лаганларга машҳур шоирларнинг суратлари ёки ғазал, шеърларидан намуналарни игна орқали чизиб, сўнг уни оловда пиширгандан сўнг ранг бераман. Бу усул жуда узоқ меҳнат талаб қилади. Масалан, битта лаганга қалам билан сурат чизганда бир-икки кун вақт кетса, бу усулда энг камида бир ҳафта-ўн кун вақт кетади. Ишим сифатли ва узоқ муддат сақланишини ҳисобга олиб, яратган санъат асарларимга талаб жуда юқори.

Амир Темур, Заҳириддин Муҳаммад Бобур, Хива хонлиги, Қўқон хонлиги шажараларини ярим метрли лаганларга чизиб, уй-музейимизда сақлаяпмиз. Инсон китоб ўқиганида кўп нарса эсида қолмаслиги мумкин. Лагандаги суратлар эса хотирани мустаҳкамлашга ёрдам беради.
– Кўпроқ қайси давлатлар билан ҳамкорлик қиласиз?
– Бу йил менга жудаям омадли келди. Жорий йилнинг июнь ойида Республикамиздаги университет талабалари ўртасида ўтказилган фан олимпиадасида «Амалий санъат ашёларида ишлаш» йўналиши бўйича совриндор бўлдим. Қолаверса, Испанияда «Декаратив ҳунарманд» йўналиши бўйича ўтказилган танловда 2-ўринни қўлга киритдим. Ўтган йили Италияда ўтказилган халқаро танловда «Бадиий кулолчилик» номинацияси бўйича 1-даражали диплом билан тақдирландим. Италия, Испаниядаям ижодимга қизиқадиган мухлислар орттирдим. Лекин кўпроқ Туркия давлати билан ҳамкорлик қиламан. 2019 йил Қўқон шаҳрида ўтказилган «Халқаро ҳунармандчилик» фестивалида туркманистонлик ижодкорлар билан шартнома тузиб, у ерда Риштон кулолчилигини ривожлантиришни келишиб олгандик. Пандемия сабабли шу режамиз ортга сурилиб турибди. Мақсадим Риштоннинг оддий тупроғидан ясалган кулолчилик маҳсулотларини бутун дунёга таратиш, устозларимдан ўрганганларимни шогирдларимга ўргатиш.
 
ЎзА мухбири
Нигора Раҳмонова суҳбатлашди.