Har ahmoqqa aytma dardu so‘zingni, Hasrat o‘ti jisming yoqqancha bo‘lmas

BO’LMAS

Har ahmoqqa aytma dardu so‘zingni,
Hasrat o‘ti jisming yoqqancha bo‘lmas.
G’ussa bilan dona-dona ko‘zingdan
Achchiq yoshlaringni to‘kkancha bo‘lmas.

Qanoatda, izzatda tut o‘zingni,
Tama’ qilib, sarg‘aytirma yuzingni,
Har nomardga hayf aylama so‘zingni,
So‘zingning binosin yiqqancha bo‘lmas.

Mag‘rur bo‘lib kezma umring guliga,
Duch bo‘larsan bir kun xazon yeliga,
Yuz yil yashab tushsang ajal qo‘liga,
Chapingdan o‘ngingga boqqancha bo‘lmas.

Ko‘ngli qora bilan bo‘lmanglar ulfat,
Yuqar undan turli-tuman kasofat,
Ko‘mirga har necha aylasang izzat,
Manglayga qorasi yuqqancha bo‘lmas.

Maxtumquli hargiz topmadi omon,
Yemon tilning zahri tig‘lardan yomon,
Yomon til yonida zahri ko‘p ilon,—
Chaqsa-da, bir chivin chaqqancha bo‘lmas.


MUHTOJ AYLAMA

Qodir Jabbor, sendan tilagim koʼpdir,

Sen meni nomardga muhtoj aylama.
Xazinangdan bergil, mening rizqimni,
Bandangni bandangga muhtoj aylama.

Аdashtirma, toʼgʼri yoʼlim egriga,

Egrini tenglama, hargiz toʼgʼriga,
Kishi moli nasib etmas oʼgʼriga,
Halolni haromga muhtoj aylama.

Nomard koʼprigidan oʼlsam, oʼtmasman,

Karvon boʼlsam, halol ishdan qaytmasman,
Qoʼlidan bir kosa sharob ichmasman,
Oʼng qoʼlni chap qoʼlga muhtoj aylama.

Yaxshi niyat, sendan tilagim koʼpdir,

Аchchiq soʼzlar tildan chiqqan bir oʼqdir,
Tuqqanning tuqqanga bahosi yoʼqdir,
Ogʼani, iniga muhtoj aylama.

Maxtumquli, Haqdan tila, borini,

Tilar boʼlsang, tila, oʼz imoningni,
Obod ayla, ikki koʼzim nurini,
Oʼng koʼzim chap koʼzga muhtoj aylama.