Ha ishlashi mumkin

Hozirgi kunda ko‘plab talablar orasida bir savol ko‘payib bormoqda, ya’ni talabalar qonuniy mehnat shartnomasi tuzgan holda ishlashi mumkinmi? Ha ishlashi mumkin. O‘zbekiston Respublikasi mehnat qonunchiligida bunga hech qanday cheklov mavjud emas. Fikrimizni quyidagicha asoslaymiz. Mehnat kodeksining (keyingi o‘rinlarda MK) 77-moddasiga ko‘ra o‘n olti (16) yoshga to‘lgan har bir shaxs mehnat qilish huquqiga ega. Shuningdek, O‘zbekiston Respublikasi Oliy va o‘rta-maxsus ta’lim vazirining “Oliy ta’lim to‘g‘risida”gi nizomni tasdiqlash haqidagi 9-sonli buyrug‘i (ro‘yxat raqami №1222 22.02.2003) 50-bandiga muvofiq kunduzgi ta’lim shaklida tahsil olayotgan talabalar o‘qishdan bo‘sh vaqtlarida oliy o‘quv yurti va boshqa tashkilotlarda mehnat shartnomasi tuzgan holda ishlashlari mumkinligi belgilangan. Bundan kelib chiqadiki, talabalar bemalol ishlashlari mumkin. Lekin mehnat qonunchiligiga ko‘ra talaba faqat ta’limdan bo‘sh vaqtida ishlash huquqiga ega. Shuni esdan chiqarmaslik kerakki, talabaning asosiy mashg‘uloti bu oliy o‘quv yurtida bilim olish hisoblanadi. Ya’ni ta’lim olish ustuvor vazifa bo‘lishi lozim.

Talabalarni qiziqtirayotgan yana bir masala yuqoridagi huquq faqat O‘zbekiston Respublikasidagi OTM talabalari uchunmi yoki qo‘shni respublikalarda o‘qiyotgan o‘zbekistonlik talabalar uchun hammi? Bu borada mehnat qonunchilida aniq qoida belgilab qo‘yilmaganligini hisobga olsak, ushbu huquqdan qo‘shni respublikalarda tahsil olayotgan talabalar ham foydalanishi mumkin.