Fayllar va kataloglar 5-dars. Fayllar va kataloglar

Fayllar va kataloglar

5-dars. Fayllar va kataloglar. 

Disk formatlanganda hosil bo'lgan har bir yo'lakdagi sektor adres va ma’lumot maydonidan iborat bo'ladi. Adres maydoniga disk, yo'lak, sektor nomerlari va nazorat yig'indisi deb ataluvchi kod yoziladi. Bu ma’lumotlar diskdan kerakli axborotni topishni ta'minlaydi. Ma’lumotlar maydoniga esa foydalanuvchining axboroti, amaliy dastur qismi, matnli axborot yoki boshqa biror ma’lumot yoziladi. Foydalanuvchining axboroti diskda alohida yozuvlar to'plamlari shaklida saqlanadi.

Biror nomga ega bo'lgan va kompyuterning tashqi xotirasida joylashgan bir turdagi ma’lumotlar majmuini fayl deb yuritiladi. Har bir fayl o'z nomiga egadir. Fayldagi ma’lumotlar matn, chizma, dastur va h.k. bo'lishi mumkin. Masalan, diskka yozilgan beysik tilidagi biror dastur yoki matn muharririda yozilgan biror matn alohida faylga misol bo'la oladi.

Fayllar haqidagi to'la ma’lumotlar disklardagi kataloglarda saqlanadi. Demak, katalog - bu fayllar nomlari, ularning hajmi, xususiyatlari (atributlari), so'nggi yangilangan vaqti va h.k.lar saqlanadigan diskdagi maxsus joy. Agar katalogda biror fayl nomi bo'lsa, shu fayl mazkur katalogda joylashgan deb aytiladi. Diskda bir nechta katalog bo'lishi mumkin. Har bir katalogda bir qancha fayllar joylashishi mumkin, lekin har bir fayl faqat bitta katalog ro'yxatida bo'ladi.