Bitiruv ishi yozish yo’riqnomasi

BITIRUV ISHI YOZISH YO’RIQNOMASI

Bitiruv ishining matni (asosiy qismi ) 45-50 sahifadan kam bo’lmasligi tavsiya etiladi. Bunda foydalanilgan adabiyotlar va ilovalar bitiruv ishining umumiy hajmiga kirmaydi.

Bitiruv ishi tinglovchi tomonidan qo‘lyozma tayyorlanishi va А4 formatdagi oq qog‘ozda yozilgan bo‘lishi kerak.

Sahifa o‘lchami kitob shaklida, yuqori va pastki maydoni - 1,5 sm, o‘ng taraf - 1,5 sm, chap taraf - 3 sm ni tashkil etishi kerak.

Bitiruv ishining betlari izchil ketma-ketlikda raqamlanishi lozim, bunda ilovalar alohida raqamlanadi. Betning tartib raqami varoqning pastki o‘ng burchagida 2 raqamidan boshlab yoziladi. Birinchi betida 1 raqami qo‘yilmaydi. Xatboshi besh-olti belgiga teng va bir xilda bo‘lishi lozim.

Davlat attestatsiya komissiyasi o‘tkazilishidan, qoida tariqasida, ikki hafta oldin universitet rektorining buyrug‘i bilan tingovchilar tomonidan bitiruv ishini himoya qilish bo‘yicha dastlabki himoyani o‘tkazuvchi, tarkibi Markaz xodimlari va tinglovchining ilmiy rahbarlaridan iborat bo‘lgan komissiya tuziladi. Komissiya faoliyatiga Markaz direktori rahbarlik qiladi.

Dastlabki himoyada tinglovchi tomonidan tayyorlangan va elektron shaklda universitet platformasiga yoki telegram orqali yuborilgan to‘liq holatdagi tadqiqot ishi Vaqtinchalik tartib talablariga muvofiqligi yuzasidan ko‘rib chiqiladi.

Dastlabki himoya internet tarmog‘ida onlayn topshirish shaklida o‘tkaziladi.

Dastlabki himoyada komissiya tinglovchining tadqiqot ishini qo‘lyozma shaklini pdf yoki jpg holatda elektron ko‘rinishini tekshiradi, tinglovchining tayyorgarligini o‘rganadi, kamchiliklarni bartaraf etish bo‘yicha tavsiyalar beradi.

Dastlabki himoyaga o‘z tadqiqot ishini topshirmagan yoki bitiruv ishi qoniqarsiz deb topilgan tinglovchiga Davlat attestatsiya komissiyasida bitiruv ishini himoya qilishga ruxsat etilmasligi mumkin.

Tinglovchi Markaz kurs rahbari orqali Davlat attestatsiya komissiyasi o‘tkazilishidan kamida bir hafta oldin bitiruv ishi taqdimoti uchun 4-5 varoq ko‘rinishdagi А4 formatdagi rasm shaklidagi taqdimotni, shuningdek, elektron ko‘rinishdagi bitiruv ishi va ilmiy rahbar xulosasini Markazga taqdim qiladi.

O‘z vaqtida topshirmagan tinglovchilardan bitiruv ishi faqat Markaz direktori ruxsati bilan qabul qilinishi mumkin.

Tinglovchi tomonidan yuborilgan taqdimot va bitiruv ishi (ilmiy rahbar xulosasi bilan birga) Markaz tomonidan Davlat attestatsiya komissiyasiga elektron ravishda taqdim etiladi.