Bayrogʻim ardogʻim mening

Bayrogʻim ardogʻim mening
Har bir davlat mustaqilligining asosiy ramzlaridan biri bu — bayroq. Bayroq shunchaki rasmiy tarzda kerakligi yo qaysidir joyda koʻtarilib turishi uchungina bor emas. Unda butun xalqning Vatan tushunchasi mujassam boʻlishi kerak, shuning uchun ham har bir davlat oʻz bayrogʻini qabul qilayotganda oʻz xalqining urf-odatlari, asosiy dini, tarixi, etnografiyasiga eʼtibor qaratadi va shulardan kelib chiqqan holda oʻz bayroqlarini yaratishadi.
Shu maʼnoda bizning Vatanimiz, Oʻzbekiston respublikasining bayrogʻi ham katta ahamiyatga va maʼnoga ega. Mustaqil boʻlganimizdan soʻng, albatta, davlat ramzlari yaratilishi kerak edi. Oʻsha paytdagi murakkab siyosiy vaziyat, kuchli bosimlar ostida turgan holatda tez va mukammal tarzda ishlash talab etilardi. Ayni shunday vaziyatga har tomonlama oʻylangan, xalqimiz va davlatimiz oʻzligini aks ettirga bayroq yaratildi.
Vatanimiz bayrogʻi ramzi mamlakat hududida ilgari mavjud boʻlgan gʻoyat qudratli saltanatlar bayroqlariga xos boʻlgan eng yaxshi anʼanalarni davom ettirgan holda respublika tabiatiga xos xususiyatlarni, xalqning milliy va madaniy oʻzligini ham aks ettiradi.