Barcha mustaqil so‘z turkumlari, so‘z birikmasi va gap o‘rnida almashinib qo‘llaniluvchi, ularga ishora qiluvchi yoki so‘roq bildiruvchi so‘zlar olmosh hisoblanadi

OLMOSH . Sirojiddin Rahmatullayev.2020.Www.Uz.

Barcha mustaqil so‘z turkumlari, so‘z birikmasi va gap o‘rnida almashinib qo‘llaniluvchi, ularga ishora qiluvchi yoki so‘roq bildiruvchi so‘zlar olmosh hisoblanadi.

Masalan: Kitobni ko‘p o‘qisangiz, undan ko‘p hikmat topasiz. Istagim shuki, doimo tinchlik bo‘lsin.

Birinchi gapda undan olmoshi kitob so‘zi (ot) o‘rnida, ikkinchi gapda shuki olmoshi doimo tinchlik bo‘lsin gapi o‘rnida qo‘llanilgan.

Olmoshlarning aniq atash ma’nosi bo‘lmaydi. Uning qaysi ma’noda kelayotgani matnda qaysi so‘z yoki gap o‘rnida almashinib kelishiga qarab belgilanadi. Shuning uchun ular ICHI BO’SH so’zlar deyiladi.

Olmoshalr ot, sifat, son, ravish, ba’zan gap o’rnida ham qo’llanib kela oladi.

Masalan:

1.Yaxshilik qilish qo’lingdan kelmadimi, yomonlik ham qilma. Bu yodingdan chiqmasin. (Bu- olmoshi gap o’rnida )

2.Gullar ochildi. Uning ochilishi hammani quvontirdi. (Uning olmoshi gul o’rnida qo’llanilmoq- da, ot o’rnida.

3.Unda o’n so’m pul bor, menda ham shuncha pul bor. ( Shuncha – olmoshi o’n son so’z turkumi o’rnida kelgan)

4.Gullarning ko’pi yashil rangda, ana shu rang menga yoqadi. (Ana shu – olmoshi yashil sifati o’rnida kelgan )

5.Diyorbek gullarni toptadi. Bu bog’bonning jahlini chiqardi.

ESLATMA:

Olmoshning ma’noviy turlari :

1.Kishilik olmoshlari:

Uch shaxsdan biriga ishora qiluvchi olmoshlar kishilik olmoshlari hisoblanadi. So‘zlovchi birinchi shaxs, tinglovchi ikkinchi shaxs, nutqdan tashqari barcha shaxs, narsa, voqea-hodisalar o‘zga, ya’ni uchinchi shaxs sifatida qaraladi.

Men, biz birinchi shaxs, sen, siz ikkinchi shaxs, u, ular uchinchi shaxs kishilik olmoshlari hisoblanadi. Bulardan men, sen, u birlik, biz, siz (lar), ular ko‘plik nma’nosini bildiradi.

Ba’zan biz, siz, ular birlik ma’nosida ham qo‘llaniladi. Biz birlik ma’nosida qo‘llanganda, kam-tarlik, bajargan ishida o‘zini ta’kidlamaslik ma’nosini bildiradi.

Masalan: Mening uyim o‘rniga Bizning uyimiz. Men g‘olib chiqdim o‘rniga Biz g‘olib chiqdik.
Shuningdek, siz, ular yakka shaxsga ishora qilib, hurmat ma’nosini ham bildiradi.

Masalan: Sen kelding o‘rniga Siz keldingiz, U keldi o‘rniga Ular keldilar.

Siz hurmat ma’nosini bildirganda, ko‘pincha ko‘plik ma’nosini ifodalash uchun unga -lar qo‘shimchasi qo‘shiladi.

Masalan: Sizlarga doimo baxt yor bo‘lsin.

Eslatma: Eski o’zbek tilida kamtarlik belgisi sifatida men olmoshi o’rnida ko’pincha faqir, kamina, kaminayi kamtarin, qulingiz, bandayi ojizingiz singari so’zlar bilan birga qo’llaniladi.Yuqoridagi so’zlar men olmoshi o’rnida qo’llanganda gapning kesimi III shaxsda, ba’zan esa I sgaxsda bo’ladi.

Masalan:

Faqir sizning xizmatingizga tayyor.

Kamina xizmatingizni sog’inganmen.

Kishilik olmoshlariga umuman egalik qo’shimchalari qo’shilmaydi. Men, sen olmoshlariga -ni, -ning, -niki qo‘shimchalari qo‘shilganda, talaffuzda bir n tovushi tushib qoladi va shunday yoziladi.
2.O’zlik olmoshi:

Kishilik olmoshlari o‘rnida qo‘llanilib, ko‘pincha shaxsni, ba’zan predmetni ko‘rsatuvchi o‘z so‘zi o‘zlik olmoshi sanalad.

Masalan: Abdug’ani qizchasini tashlab, o’zi tog’ga ketdi. (shaxs o’znida )

O’zi bukur, tishi o’tkir, dehqonga o’rtoq. (narsa o’rnida)

O‘zim, o‘zing, o‘zi so‘zlari ba’zan egalik qo‘shimchalariga mos kishilik olmoshlari bilan mening o‘zim, sening o‘zing, sen o‘zing, uning o‘zi, u o‘zi tarzida qo‘llanadi va bu vaqtda ko‘pincha kishilik olmoshlariga ta’kid ma’nosi yuklanadi.
Eslatma: O’zlik olmoshi tarkibidagi –lar qo’shimchasi quyidagi vazifada keladi.

1.Morfologik vazifa: Bunda ko’plik ma’nosi ifodalanadi.

Menda kitoblar ko’p.

2.Uslubiy vazifa :

a)Hurmat ma’nosi ifodalanadi. Majlisni ra’isning o’zlari ochib berdilar.

b)Kinoya ma’nosi : O’zlari ham kelibdilar-da.

O’zlik olmoshiga kelishik qo’shimchalari egalik qo’shimchasidan so’ng qo’llanadi.

Masalan: O’zimga, O’zingdan.
Eslatma: O’zlik olmoshidan ravishga ko’chgan so’zlar mavjud.

Masalan: o’z-o’zidan, o’zidan-o’zi, o’z-o’zicha.

Quyidagicha farqlanadi:

1.Olmosh : O’qimaganlar o’z-o’zidan nafratlanib ketdi.

2.Ravish: Mashina o’z-o’zidan yurib ketdi.

3. Modal: O’z-o’zidan, Abituriyentlarning salohiyati oshib bormoqda.

3.Ko’rsatish olmoshi :

Oldingi gap, gapdagi biron-bir so‘z, so‘z birikmasi o‘rnida qo‘llanib, unga ishora qiluvchi yoki biror so‘zni aniqlab keluvchi olmoshlar ko‘rsatish olmoshlari hisoblanadi. So‘z ma’nosini aniqlab keluvchi olmoshlar o‘zi aniqlayotgan so‘zdan oldin qo‘llanadi.

Masalan: Bu daftar meniki.

Bu, shu, u, o‘sha, ana, mana kabi so‘zlar ko‘rsatish olmoshlari sanaladi.

Eslatma:

U olmoshi kim ? so’rog’iga javob bo’lsa, eganing vazifasini bajarsa – Kishilik olmoshidir.

Masalan: U keldi.

U olmoshi qaysi ? so’rog’iga javob bo’lsa, gapda sifatlovchi-aniqlovchi vazifasida kelsa – Ko’rsatish olmoshi hisoblanadi.

Masalan: U kishi keldi.

Ba’zi ko‘rsatish olmoshlariga egalik va jo‘nalish, o‘rin-payt, chiqish kelishigi qo‘shimchalari qo‘shilganda, shuningdek, -dek, -day, -aqa, -cha «n» tovushi orttiriladi:

shu+n+ga, bu+n+da, bu+n+im, o‘sha+n+ga, shunaqa, shuncha kabi.

Ko’rsatish olmoshlariga III shaxs egalik qo’shimchalari ikki marta qo’shiladi.

Masalan : shu+n+i+si = shunisi. Bu+n+i+si = bunisi.

Yozuvda mana bu, mana shu, ana bu, ana shu olmoshlari ajratib yoziladi. Ba’zan bu olmoshlar og‘zaki nutqda manovi, anovi tarzida talaffuz qilinishi va shunday yozilishi mumkin.

Shu onda, shu tobda, u yoqqa, bu yoqqa, u yerda, bu yerda so’zlari ravishga tegishli, ularning tarkibidagi olmoshlar ravish bilan bir butunlikni hosil qilgan va olmosh emas.
Ko’rsatish olmoshi Juft tarzida kela oladi: u-bu, ul – bul, uncha – buncha

Takroriy kela oladi: o’sha-o’sha, shu-shu, uncha-buncha

4. SO’ROQ OLMOSHLARI :

Shaxs, narsa-hodisa, belgi-xususiyat, miqdor, sabab, maqsad, o‘rin, payt haqida so‘roqni bildiruvchi olmoshlar so‘roq olmoshlari sanaladi.

Quyidagilar kiradi:

So‘roq olmoshlari : kim? nima? Qayer,ga,da? qanaqa? qaysi? qalay? qancha? necha? nega? qani?

Nima uchun? Nima sababdan ?

Qani? olmoshi ham olmosh, ham nutqiy odat undovidir:

Masalan: Kitob qani ?

Qani, bolalar marhamat.

Ergash gap tarkibidagi so’roq olmoshi so’roqlik ma’nosini yo’qotadi.Lekin so’roq olmoshini toping deganda sanaladi.

Masalan: Kim ko’p o’qisa, o’qishga kiradi.

So’roq olmoshi takror qo’llanganda, ko’plik ma’nosini bildiradi.

Masalan: Majlisga kim-kim kelmadi ?

So’roq olmoshlari turlanganda belgili yoki belgisiz qo’llanadi .

Masalan: Sen nima(ni) olding ?

So‘roq olmoshlari ishtirok etgan gaplar so‘roq gap hisoblanadi. Bunday gaplar so‘roq ohangi bilan talaffuz qilinadi va yozuvda gap oxiriga so‘roq belgisi qo‘yiladi:

Masalan: Siz qaysi kitoblarni o‘qigansiz?

BELGILASH OLMOSHI:

Har so‘zi so‘roq olmoshlariga(har qanday, har kim, har qachon, har qaysi, har qancha), bir so‘ziga qo‘shilib to‘pdan ajratilgan shaxs, narsa, belgilarni bildiradigan belgilash olmoshlarini hosil qiladi.

Masalan : Har kim o’zidan bilib o’qimog’i lozim.

Har bir kitobni o’qish - farz.

Hamma, barcha, bari, butun olmoshlari esa shaxs, narsa, belgi, harakatlarni jamlab ifodalaydi.

Demak, to‘pdan ajratilgan yoki jamlab ko‘rsatilgan shaxs, narsa, belgi, harakat-holatlarni ifodalaydigan

olmoshlar belgilash olmoshlari sanaladi.

Butun olmoshi sifat bo’lishi ham mumkin. Shunday holatda hamma so’zi bilan almasha olganda –olmosh, almashmasa – sifat.

Masalan: Butun xalq jamlandi.(olmosh).

Diyorbek yaxshi bola emas, ammo aqli butun bola. (sifat)

GUMON OLMOSHI:

So‘roq olmoshlariga alla- yoki -dir qo‘shimchasini qo‘shish yo‘li bilan gumon olmoshlari hosil qilinadi. Alla- qo‘shimchasi so‘roq olmoshlari oldidan, -dir qo‘shimchasi esa so‘roq olmoshlari so‘ngidan qo‘shiladi. Har ikki qo‘shimcha asos qism bilan qo‘shib yoziladi.

Masalan: kimdir, qachondir, qandaydir, qanchadir, allaqaysi, allanarsa, allakim, allaqanday

Narsa so‘zi faqat alla- qo‘shimchasi yordamida gumon olmoshiga aylanadi.

Bir so‘zi kishi, narsa, nima kabi so‘zlarga qo‘shilib, bu so‘zlarga gumon ma’nosini yuklaydi. Ularni kimdir, nimadir, qachondir singari gumon olmoshlari bilan almashtirish mumkin. Bunday vaqtda bir so‘zi gumon olmoshi o‘rnida qo‘llangan bo‘ladi. Shu bilan birga birov so‘zi ham kimdir so‘zi bilan erkin almashina olgani uchun gumon olmoshi hisoblanadi.

Masalan:

1.Pochchamdan dasturxonni olib qoqish uchun gilosning yonidan o‘tarmanmi, allanima baloga turtinib ketdim.

2. Shorahim ko‘z yoshidan hech narsani ko‘rmay, allanimalar deb g‘udrandi.

3. Allaqayerdan oyim paydo bo‘ldi.

Birov so’zi kimdir ? gumon olmoshi bilan erkin almasha olganligi uchun gumon olmoshi hisoblanadi.

BO’LISHSIZLIK OLMOSHI:

So‘roq olmoshlari va bir, narsa, nima so‘zlari oldidan hech so‘zining qo‘llanishi natijasida bo‘lishsizlik olmoshlari hosil bo‘ladi. Hech kim, hech nima, hech qachon, hech qanday, hech qancha, hech narsa, hech bir so‘zlari bo‘lishsizlik olmoshlari sanaladi va ular yozuvda ajratib yoziladi.

Masalan:

1.Moziylar sasiga quloq tutgum jim, ustun bo‘lgan emas dunyoga hech kim.

2. Haqing berma hech kimga, urho-yo, urho.

3. Hammasi joyida, do‘stlar, men hech kimdan, hech narsadan xafa emasman.

4.Hech bandaning boshiga farzand dog‘ini solmasin ekan.
OLMOSHLARNING TUZILISHIGA KO‘RA TURLARI

Olmoshlar tuzilishiga ko‘ra sodda, qo‘shma, juft va takroriy bo‘ladi.

Faqat bir asosdan iborat bo‘lgan olmoshlar sodda, ikki asosdan tashkil topgan olmoshlar qo‘shma olmoshlar hisoblanadi.

Kim?, nima?, hamma, barcha singari tub olmoshlar, kimdir, qaysidir, allakim, allaqanday singari yasama olmoshlar sodda olmoshlardir.

Hech kim, hech qachon, har bir, har kim, mana shu, ana o‘sha kabi olmoshlar qo‘shma olmoshlardir.

Sodda olmosh qismlari qo‘shib, qo‘shma olmosh qismlari esa ajratib yoziladi.

Bir-biriga mazmunan yaqin bo‘lgan olmoshlarning birikuvidan hosil bo‘lgan olmoshlar juft olmoshlar sanaladi: sen-men, u-bu, siz-biz, unda-bunda.

Bir olmoshning aynan takrorlanishidan hosil bo‘lgan olmoshlar takroriy olmoshlar hisoblanadi: shu-shu, nimanima, kim-kim, uncha-muncha va hokazo.

Juft va takroriy olmoshlar qismlari chiziqcha bilan yoziladi.