7-ma’ruza: maktabgacha ta`lim muassasalarida jismoniy tarbiya bo`yicha ishni rejalashtirish. Maqsad

7-MA’RUZA: MAKTABGACHA TA`LIM MUASSASALARIDA JISMONIY TARBIYA BO`YICHA ISHNI REJALASHTIRISH.

MAQSAD: Talabalarni maktabgacha tarbiya yoshidagi bolalarda pedagogik jarayonni takomillashtirishda ta’lim va tarbiya berishda, jismoniy tarbiya bo`yicha ishni rejalashtirish va hisobga olishga o`rgatish.

REJA:

1. 
   Jismoniy tarbiya bo`yicha ishni rejalashtirish turlari.
   
2. 
   Ishni hisobga olish.
   

Rejalashtirish mashqlar va ularni jismoniy tarbiyaga doir turli ish shakllarida, muayyan vaqt oralig’ida o`tkazish usullarini taqsimlashdir. To`g’ri rejalashtirish jismoniy mashqlarni muntazam qo`llash va o`quv tarbiya jarayonida eng yuqori natijalarga erishish imkonini beradi.

Maktabgacha tarbiya muassasalarida har bir yosh guruhi uchun jismoniy mashqlarning yillik, haftalik taqsimlash reja grafigi, jismoniy tarbiya bo`yicha jismoniy tarbiya mashg’ulotlari, ertalabki gimnastika, harakatli o`yinlar va boshqa shakllarining reja-konspektlari ishlab chiqiladi.

Jismoniy mashqlarni yillik taqsimlash reja-grafigi.

Tarbiyachi o`z gruhi uchun yillik reja tuzishga kirishishdan oldin bolalarning sog’lig’i, jismoniy rivojlanishi, jismoniy tayyorgarigi haqidagi ma’lumotlarni sinchiklab tahlil qilib chiqadi va dasturdan jismoniy mashqlar, shu jumladan, harakatli o`yinlarni ham tanlab oladi.

Agar bolalardagi harakat malakalari va jismoniy sifatlarining ko`rsatkichlari normadan yuqori bo`lsa, tarbiyachi qo`shimcha ravishda murakkabroq jismoniy mashqlardan ham foydalanishi mumkin. Agar bolalarning jismoniy tayyorgarlik darajasi yetarli bo’lmasa, dastlabki mashg’ulotlarda oldingi gruhlar uchun tavsiya qilingan mashqlardan foydalanish mumkin.