13-модда. Ер тузиш лойиҳасини кўриб чиқиш ва тасдиқлаш
Маъмурий-ҳудудий бирликларнинг чегараларини жойнинг ўзида белгилашга доир материаллар, шунингдек истиқболга мўлжалланган ҳамда лойиҳалаш олдидан ер тузиш ишларига доир бошқа материаллар қонун ҳужжатларида белгиланган тартибда кўриб чиқилади ва тасдиқланади.
Хўжаликлараро ва хўжалик ичидаги ер тузиш лойиҳалари қишлоқ хўжалиги ҳамда ўрмон хўжалиги корхоналари, муассасалари ва ташкилотлари мол-мулкининг мулкдорлари ёки улар ваколат берган органлар томонидан кўриб чиқилади ва қабул қилинади, шунингдек манфаатдор ташкилотлар билан келишилади.
Хўжаликлараро ер тузиш лойиҳалари вилоят ҳокими томонидан тасдиқланади. Юридик ва жисмоний шахсларга ер ажратиб бериш лойиҳалари Ўзбекистон Республикаси Вазирлар Маҳкамаси, вилоят, туман ва шаҳар ҳокимлари томонидан тасдиқланади.
Қишлоқ хўжалиги ва ўрмон хўжалиги корхоналари, муассасалари ва ташкилотларининг ички хўжалик ер тузиш лойиҳалари туман ҳокими томонидан тасдиқланади. Ер тузиш лойиҳаларига ўзгартишлар ушбу лойиҳаларни тасдиқлаган органларнинг рухсати билан киритилади.
Ер тузишни ер тузиш хизмати органлари давлат бюджети маблағлари ҳисобидан амалга оширади. Қишлоқ хўжалик экинзорларини жойлаштириш, ерларни яхшилаш ва муҳофаза қилиш, эрозияга қарши ва мелиорация тадбирларини амалга ошириш борасидаги ер тузиш лойиҳаларини ишлаб чиқиш юридик ва жисмоний шахсларнинг талабномаларига мувофиқ улар ҳисобидан амалга оширилиши мумкин.
Ер тузиш лойиҳасини тузиш ўзининг мазмуни ва аҳамияти жиҳатидан ер тузиш жараёнининг асосий босқичи ҳисобланади. Чизма (лойиҳа режаси) ва матн қисмларидан иборат бўлган ер тузиш лойиҳаси бу босқичда асосий юридик ҳужжат ҳисобланади. Лойиҳада ер тузиш объектининг хусусиятлари инобатга олинган ҳолда ердан фойдаланиш иложи борича оқилона ва самарали фойдаланиш иқтисодий асослантирилади ва ишлаб чиқилади.
Ер тузиш лойиҳалари тегишли ер эгалари, ердан фойдаланувчилар, ижарачилар иштирокида ва ваколатли давлат органларининг тасдиғидан сўнг белгиланган намунадаги чегара белгилари билан ер участкаси ва даланинг чегаралари кўрсатилган ҳолда натурага (жойнинг ўзига) ўтказилади. Ер тузиш тартибида белгиланган ҳудудни ташкил этиш мулкдорларга, ер эгаларига, ердан фойдаланувчиларга ва ижарачилар учун мажбурий ҳисобланади.
Лойиҳани тасдиқлаш босқичи ер тузиш жараёнларининг бажарилиши ва лойиҳани натура(жойнинг ўзи)га ўтказишни амалга оширишга асос бўлиб, лойиҳани тасдиқлаган давлат органининг қарори (фармойиши) ҳисобланади.
Тасдиқланган ер тузиш лойиҳаси чегараларини белгилаш орқали натура (жойнинг ўзи)га кўчирилади. Ер тузиш лойиҳасини натурага кўчиришда манфаатдор мулк эгаларининг вакиллари, ердан фойдаланувчилар, ижарачилар қатнашадилар. Бажарилган иш белгиланган тартибдаги акт ва кўчириш чегараларининг иш чизмалари илова қилинган ҳолда расмийлаштирилади.
Тасдиқланган ва натурага ўтказилган ер тузиш лойиҳаларига асосан мулкдорларга, ер эгаларига ва ердан фойдаланувчиларга ерга нисбатан мулк ҳуқуқи, ерга эгалик қилиш ҳуқуқи ва ердан фойдаланиш ҳуқуқи давлат гувоҳномалари (актлари) берилади. Шунингдек лойиҳа ҳужжатлари ва бошқа ер тузиш ҳужжатлари ҳам берилади.
Do'stlaringiz bilan baham: |