Ўзбекистон республикаси президенти ҳузуридаги давлат бошқаруви академияси янги ўзбекистон – янгича дунёқараш

3.3.Тадбиркорликни ривожлантириш, инвестицияларни жалб қилиш ва соғлом рақобат муҳитини шакллантиришдаги долзарб вазифалар

Жаҳон амалиётида миллий иқтисодиётларнинг барқарор ривожланишида тадбиркорлик фаолияти муҳим ўрин эгаллаб, иқтисодий ва ижтимоий муаммоларни ҳал этишда етакчи ўрин тутади. Жаҳон иқтисодиётида бандлик, ижтимоий ҳимоя, маҳсулот ва хизматларнинг янги турларини ишлаб чиқаришда бу соҳа муҳим аҳамият касб этади.

Бизнинг юксак тарихимизга назар ташласак, Амир Темур ва Темурийлар даврида, яъни XIV-XV асрларда Самарқанд фан, адабиёт, мусиқа ва тасвирий санъат, халқ театри, рақс санъатлари юксак ривожланган марказ сифатида тан олинган. Соҳибқирон Амир Темур (1336-1405) Европа давлатлари рахбарлари билан фаол сиёсий ва савдо муносабатларни олиб борган. Амир Темур тадбиркорлик фаолиятини қўллаб-қувватлаб ва тадбиркорларни улуғлаб, уларнинг нафақат ўзи балки жамият учун ҳам катта нафи тегишини, инсон доимо фаол бўлишини таъкидлаб, ўз тузукларида “Ишбилармон, мардлик ва шижоат соҳиби, азми қатъий, тадбиркор ва ҳушёр бир киши, минг-минглаб, тадбирсиз, лоқайд кишилардан яхшидир”, деб кўрсатади¹².
Кейинчалик АҚШ ва Европа давлатларида тадбиркорлик тушунчаси XVI-XVIII асрдан бошлаб иқтисодчилар, руҳшунос ва сиёсатшунослар фикрини ўзига жалб эта бошлади.

3.7.-расм. Тадбиркорлик термини ҳақидаги илк қарашлар муаллифи бўлган хорижлик давлатлар буюк аллома ва мутафаккирлар

Товар ва молия бозорларида эркин рақобат муҳитини шакллантириш ҳамда тадбиркорларга хомашё сотиб олиш учун тенг имкониятлар яратиш зарур.
Шавкат МИРЗИЁЕВ
Ўзбекистонда амалга оширилаётган самарали инвестиция сиёсати, кичик бизнес ва тадбиркорликни ривожлантириш – ижтимоий-иқтисодий тараққиёт омили. Мазкур соҳа ички бозоримизни рақобатбардош ва сифатли маҳсулотлар билан тўлдиришда, аҳолини иш билан таъминлаш ва даромадини оширишда энг асосий омиллардан бири ҳисобланади.

Давлатимиз раҳбари томонидан электр энергияси, газ, қимматбаҳо металлар, минерал ўғитлар, транспорт хизматлари каби йўналишларда монопол бозорлар мавжуд бўлиб, уларда кўплаб муаммолар сақланиб қолаётганлиги ҳақида алоҳида тўхталиб ўтилди. Мисол тариқасида буни биз электр энергиясига талабнинг ошишида кўришимиз мумкин (3.1.-Диаграмма).