Ўзбeкистон Рeспубликаси Олий ва ўрта махсус таълим вазирлиги Тошкент кимё-технология институти “Менежмент ва касб таълими” факультети

7) Ақлий ҳужум усули. Бу усул дарс мавзусига оид саволга жавоб топиш мақсадида ғояларни жамлаш ва саралаш учун қўлланилади. Ҳар бир талаба ўзининг шахсий ғояларини илгари суради. Босқичлари – муаммоли вазият пайдо қилиш; ечимни топиш учун ғоя, фикр бериш; ечимлар тақдимотини эшитиш; ечимларни солиштириш ва танлаш; хулоса қилиш.
8) Эссе. Бу мавзу бўйича чекланган ҳажмда ёзиладиган иншо ҳисобланади. Эсседа талаба ўқув материали бўйича ўзининг шахсий фикрини эркин ифода этади.
Интерфаол ўқитиш усуллари (Activity)
Амалий машғулотларда интерфаол ўқитиш усуллари қўлланилади. Бу усуллар талабаларда жамоада ишлаш, касбга оид мустақил ва танқидий фикрлаш, мулоқот маданияти ва хулоса чиқариш кўникмаларини шакллантиради. Қуйида фан хусусиятларига хос баъзи усуллар баён этилган.
1) «Тушунчалар таҳлили» усули. Талабалар тушунчаларни дастлаб якка тарзда ва кейин жамоада муҳокама қилишади. Ўқитувчи жамоанинг фикрини йўналтириб туради ва охирида экранга атамаларнинг изоҳини чиқаради. Талабалар ўз фикрларини таққослашади, баҳолашади ва билимларини мустаҳкамлашади.
2) «Зинама-зина» усули. Талабалар мавзу бўйича якка тарзда фикрини график ифода этишади, кейин гуруҳда муҳокама этишади. Гуруҳлар тақдимоти ўтказилади ва график материаллар доскага мантиқий поғоналар тарзида илиб борилади.
3) “Чархпалак” усули. Кичик гуруҳлар ўз тарқатма материалларидаги вазифани бажариб, чархпалак айланиши бўйлаб бир-бирига узатишади, ҳар бир гуруҳ бошқаларнинг ишига тузатиш киритади ва охирида ўзларига қайтиб келади. Гуруҳлар ўз ишини тузатишлар билан такомиллаштирган ҳолда тақдимот қилишади.
4) «Бумеранг» усули. Талаба бажарган ишини аввал ўз кичик гуруҳида, кейин бошқа кичик гуруҳда муҳокама қилади, сўнг яна ўз гуруҳига қайтиб келиб умумлаштиради. Охирида гуруҳлар тақдимоти ўтказилади.
5) «Резюме» усули. Кичик гуруҳларда муаммолар ўрганилиб, таҳлил қилинади ва хулоса ёзма ифода этилади. Тақдимотда хулоса кўрсатилмайди, бошқа талабаларнинг тақдимотга нисбатан фикрлари ҳисобга олиниб янги хулоса шакллантирилади ва аввалги ёзма хулоса билан таққосланади.