Ўзбекистон республикаси олий ва ўрта махсус таълим вазирлиги тошкент молия институти “молиявий менежмент” факультети

Педагогик амалиётни ўтказишга тайёрлаш
Педагогик амалиётнинг самарали ўтишида амалиёт ташкил этиладиган билим даргоҳи жамоасининг ўрни беқиёсдир. Агар бу жамоа олий ўқув юрти амалиётчи-талабаларининг шу таълим даргоҳида педагогик амалиётда бўлишини ўзлари учун шарафли, ўта масъулиятли иш эканлигини ҳис килган ҳолда қабул қилишса, педагогик амалиётнинг муваффақиятли ўтиши учун улар қулай шароит яратган бўладилар. Бу ўз навбатида ушбу билим даргоҳида таълим-тарбия ишларини яхшилашга хизмат қилади. Чунки, педагогик амалиёт даврида амалиётчи-талабаларнинг ўзлари касб сирларини мукаммал ўрганиш жараёнида мутахассислик фанлари ўқитувчилари ва гуруҳ раҳбарларига яқиндан ёрдам беришади. Натижада ушбу касб-ҳунар коллежида таълим-тарбия ишларининг самарадорлиги ошади. Шунинг учун педагогик амалиётни ўтказиш учун танланган касб-ҳунар коллежида тайёргарлик ишларини олдиндан амалга ошириш мақсадга мувофиқдир.
Касб-ҳунар коллежини педагогик амалиётни ташкил этишга тайёрлаш жараёнида педагогик амалиёт раҳбари ва методистлар мутахассислик фанлари ўқитувчилари ҳамда гуруҳ раҳбарларининг режалари билан танишиб чиқиб, тегишли йўриқномаларни бериши педагогик амалиётни юқори савияда ўтишда муҳим ўрин тўтади.
Педагогик амалиётнинг муваффақиятли ўтиш омилларидан яна бири амалиёт жараёнида олиб бориладиган таълим-тарбия ишларини режалаштиришдир.
Педагогик амалиёт даврида амалга ошириш керак бўлган таълим-тарбия ишлари олдиндан педагогик амалиёт тўғрисидаги йўриқномаларга, дастур талабига асослаган бўлмоғи, педагогик амалиёт мазмуни, вазифалари ва талабаларни тўлалигича ўз ичига қамраб олмоғи лозим. Олиб борилган илмий-методик изланишлар шуни кўрсатадики, педагогик амалиёт режасини касб-ҳунар коллежи педагогик кенгашида муҳокама қилиш, тегишли таклиф ва мулоҳазаларни киритган ҳолда тасдиқлаш амалиёт ишларини талаб даражасида ташкил этишда муҳим ўрин тўтади.
Педагогик амалиёт жараёни
Амалиётчи-талаба педагогик амалиёт жараёнида бевосита амалга ошириши керак бўлган таълим-тарбия ишлари мазмуни, уни амалга ошириш йўлларини яхши билиши лозим. Чунки, амалиётчи-талаба амалиёт мақсади, мазмун ва унинг якуний вазифалари ҳақида етарлича маълумотларга эга бўлса, амалиёт жараёни муваффақиятли ўтади.
Амалиётчи-талаба касб-ҳунар коллежи ҳаёти билан тўла танишиб (касб-ҳунар коллежи жамоаси, унинг моддий базаси, тарихи, касб-ҳунар коллежи низоми, устави ва ҳоказо), биринчи навбатда ўзига бириктирилган академик гуруҳ ўқувчиларини ва гуруҳ жамоасини ўрганиши мақсадга мувофиқ. Бунда, академик гуруҳдаги ҳар бир ўқувчисининг шахсий хусусиятларини чуқур ўрганиш талаб этилади (ўқувчи-талабаларда хотира, диққат ва қизиқишининг ривожланиши; ўз-ўзини англаш ва ҳарактернинг шаклланиши; ўзлаштириш даражаси; гуруҳ жамоаси аъзоларининг ўзаро муносабати; амалиётчи-талаба ва ўқувчи-талаба ўртасидаги дўстона муносабатлар; ўқувчи-талабаларнинг ўрганилаётган фанга қизиқиши; касб-ҳунар коллежи ижтимоий ҳаётидаги иштироки ва ҳоказо).
Юқоридагиларга эришиш учун амалиётчи-талабадан жуда катта билим ва изланиш талаб этилади. Шунинг учун педагогик амалиёт даврида амалиётчи-талаба вақтни тўғри тақсимланган ҳолда ишни ташкил этиши, малакали мутахассислар ёрдамидан унумли фойдаланиши тавсия этилади. Педагогик амалиёт мақсадини ва мазмунини тўғри англаб етиш ҳамда тўла ўзлаштириш, унинг вазифаларини амалга ошириш келгусида етук мутахассис бўлиб етишишини кафолатлайди.