Ўзбекистон республикаси олий ва ўрта махсус таълим вазирлиги фарғона давлат университети психология тарихи

Психология тарихининг асосий вазифалари қуйидагилардан иборат:
1. Психологиянинг фан сифатида тараққий этиш қонуниятларини ўрганиш.
2. У ёки бу психологик концепциялар ва мактабларнинг пайдо бўлиш ва ривожланиш сабабларини ўрганиш.
3. Психологик билимлар тараққиётини ижтимоий – маданий контекстда ўрганиш.
4. Психология тараққиёти тарихида шахснинг ролини ўрганиш.
Қуйидагилар тарихий – психологик тадқиқотнинг асосий принциплари бўлиб ҳисобланади: 1) тарихийлик принципи, 2) системалилик принципи, 3) илмийлик принципи, 4) тарихийлик ва мантиқийлик бирлиги принципи, 5) детерминизм принципи, 6) тараққиёт принципи.
Тарихийлик принципи тарихий психологик тадқиқот жараёнида у ёки бу илмий концепциялар тараққиётининг асосий босқичлари ва генезисини ҳисобга олиш заруриятини тақозо қилади.
Системалилик принципи тадқиқотчини тарихий – психологик фактни ўрганиш жараёнида ушбу фактнинг қолган барча тарихий – психологик фактлар билан алоқалари тўпламини қатъий ҳисобга олишга йўналтиради.
Илмийлик принципи тадқиқотчидан тарихий психологик тадқиқот жараёнида фақат илмий фактларга мурожаат қилиш ва исботлашнинг фақат илмий методларидан фойдаланишни талаб қилади.
Тарихийлик ва мантиқийлик бирлиги принципи тадқиқотчини ўрганилаётган тарихий психологик фактни шунчаки тасвирламасдан уни назарий таҳлил қилишга йўналтиради.
Детерминизм принципи тадқиқотчидан ҳар қандай тарихий психологик фактни сабабий изоҳлашни ҳисобга олишни талаб қилади.
Тараққиёт принципи тадқиқотчини ҳар қандай тарихий психологик ходисани динамика (ўсиб бориш, ривожланиш) жараёнида ўрганишга йўналтиради.
Психология тарихининг энг кўп қўлланиладиган методлари: 1) илмий мактабларни ўрганиш, 2) архив материалларини ўрганиш, 3) интервью, 4) илмий асарларга мурожаатларни таҳлил қилиш, 5) биографик ва автобиографик методлар ҳисобланади.
Илмий мактабларни ўрганиш методи тадқиқотчига турли илмий мактаблар ўзига хослиги, илмий билимлар ишлаб чиқариш усуллари, у ёки бу илмий мактаблар вакиллари ўртасидаги алоқалар хусусиятларини тадқиқ қилиш имконини беради. Тарихий психологик тадқиқот жараёнида ушбу методни қўллаш ҳар бир илмий психологик мактабни синчиклаб ўрганишни талаб қилади.