Ўзбекистон Республикаси Олий Мажлиси Сенати Халқ депутатлари маҳаллий Кенгашлари котибиятлари фаолиятини самарали ташкил этиш масалалари бўйича услубий

Маҳаллий Кенгаш депутатларига ўз ваколатларини амалга
оширишда кўмаклашиш ҳамда уни тегишли ҳуқуқий-
ахборот материаллари билан таъминлаш

Маҳаллий Кенгаш депутати ўз сайлов округида сайловчиларнинг талаб ва истаклари, мурожаатлари ва ўзи сайланган сиёсий партия дастуридан келиб чиқадиган вазифаларни амалга оширади.

Котибият ходимлари вазифалар тақсимотига кўра депутатларга бириктирилиши мумкин. Депутатга кўмаклашиш учун бириктирилган Котибият ходими депутатнинг ваколатини амалга ошириш давомида юзага келаётган муаммоларни бартараф этишга, унинг сайловчилар билан учрашувларида келиб тушган масалаларни ҳал этишга кўмаклашади.
Заруруятга кўра депутатга қонунчилик ҳужжатлари, ҳуқуқий адабиётлар, ижтимоий-иқтисодий ривожлантириш дастурларининг сайлов округига оид маълумотлари ва фаолиятга доир бошқа маълумотларни олишга ёрдамлашади.
Маҳаллий Кенгашга келиб тушадиган ҳамда ташкилот ва идораларга юбориладиган хат-ҳужжатларнинг ҳисобини юритиш

Маҳаллий Кенгашга келиб тушаётган ҳужжатлар ҳамда идора ва ташкилотларга юборилаётган ҳужжатлар ҳисоби Котибият томонидан юритилади.

Келиб тушаётган ҳужжатлар учун алоҳида, юборилаётган хат-ҳужжатлар учун алоҳида китоб юритилади.
Ҳар бир келиб тушган хатни расмийлаштириш учун бурчак тамғадан фойдаланилади, тартиб билан рақамланади. Қайд этиш дафтари варақлари рақамланган, шнурланган ва Котибиятнинг муҳри билан тасдиқланган бўлиши лозим.
Махфий ҳужжатлар белгиланган тартибда тегишли Йўриқномалар талаблари асосида юритилади.
Ҳужжатларни рўйхатга олиш, сақлаш ва юбориш билан Котибият шуғулланади, Котибият ходимининг бу борадаги малакасини ошириш ва тажриба алмашиш учун маҳаллий ҳокимлик канцеляриясида стажировка ташкил этилиши мумкин.

Маҳаллий Кенгаш фаолияти тўғрисида ҳар ой якуни бўйича
таҳлилий ахборот тайёрлаш

Котибият маҳаллий Кенгаш иш режаси асосида фаолият юзасидан ҳар ойлик таҳлилий ахборот тайёрлаб боради.

Таҳлилий ахборотда ўтказилган сессиялар, қабул қилинган қарорлар, қарорларнинг мазмуни ва уларнинг ижросига оид маълумотлар, доимий комиссиялар ва депутатлар фаолияти, депутат сўровларининг натижалари, жисмоний ва юридик шахсларнинг мурожаатлари ижроси, аҳоли билан учрашувларда кўтарилган муаммоли масалаларни ҳал этишга кўмаклашиш борасидаги ишлар ва уларнинг натижалари ҳақидаги маълумотлар акс эттирилади.
Шунингдек, ўтган вақт давомида маҳаллий Кенгаш депутатлари иштирокида ўтказилган семинарлар, давра суҳбатлари ва уларда муҳокама этилган масалалар ёритилади. Оммавий ахборот воситаларида маҳаллий Кенгаш фаолиятининг ёритилиши, янги қонун ҳужжатлари лойиҳалари муҳокамаси ҳақида атрофлича маълумотлар бериб борилиши лозим.
Ҳар ойлик фаолиятни таҳлил этиш учун намунадаги ҳисобот шаклларини юритиш тавсия этилади.