Ўзбекистон Республикаси Олий Мажлиси Сенати Халқ депутатлари маҳаллий Кенгашлари котибиятлари фаолиятини самарали ташкил этиш масалалари бўйича услубий

Маҳаллий Кенгаш раисининг топшириқлари ижроси
устидан назорат олиб бориш

Маҳаллий Кенгаш фаолиятида ҳужжатлар билан ишлаш муҳим аҳамиятга эга. Маҳаллий Кенгаш раиси, доимий комиссия раиси, котибият мудири томонидан ўз ваколати доирасида турли идора, ташкилот ва муассасаларга алоқа хатлари юборилади.

Маҳаллий Кенгаш томонидан юбориладиган хатлар учун махсус бланк тайёрланади, юборилаётган хатларни расмийлаштириш китоби юритилади, унда хатнинг рақами, имзоланган санаси, мансабдор шахснинг исм-фамилияси ва лавозими, қисқача мазмуни, назорати икмга юклатилганлиги қайд этилади.
Шунингдек, маҳаллий Кенгаш раиси иш режа ижросини ташкил этиш, доимий комиссиялар фаолиятини юритиш, депутатлар фаоллигини ошириш мақсадида Котибият ходимларига топшириқлар бериши мумкин.
Маҳаллий Кенгаш раисининг ҳар бир топшириғи шу куннинг ўзида ижрочига етказилади ва ижроси назоратга олиниб, мониторинг қилиб борилади. Топшириқ ижроси юклатилган котибият мудири, масъул ходим, доимий комиссия раиси ёки депутат томонидан унинг қай даражада бажарилганлиги ҳақида маҳаллий Кенгаш раисига ахборот берилади ва топшириқ тўла бажарилгандан сўнг назоратдан олинади.

Маҳаллий Кенгаш фаолиятига оид тадбирлар тўғрисидаги
хабарлар тайёрланишини ва оммавий ахборот воситаларида чоп этилишини, маҳаллий Кенгашнинг расмий веб-сайтида жойлаштирилишини ташкил этиш

Маҳаллий Кенгаш томонидан ўтказиладиган ҳар бир тадбирдан олдин Котибият томонидан пресс-релиз тайёрланади, пресс-релизда тадбир билан боғлиқ барча масалалар мазмун-моҳияти батафсил очиб берилиши лозим.

Масалан, маҳаллий Кенгаш сессияси бўйича пресс-релизда ушбу сессияни чақириш бўйича қарордан тортиб, кун тартиби, ҳар бир масаланинг долзарблиги, мазмуни, ҳисобот (ахборот) берувчилар, эришиладиган натижалар бўйича аниқ фактлар акс этиши мақсадга мувофиқ.
Тадбир ўтказилган кунниг ўзида бу ҳақдаги маълумот, сессия ўтказилганда эса қабул қилинган қарор тасдиқлангандан кейин маҳаллий Кенгаш расмий веб-сайтига жойлаштирилиши зарур.