Ўзбекистон Республикаси Иқтисодий тараққиёт ва камбағалликни қисқартириш вазирлигига

Ўзбекистон Республикаси
Иқтисодий тараққиёт ва камбағалликни қисқартириш вазирлигига
Кадастр агентлиги Ўзбекистон Республикаси Вазирлар Маҳкамасининг Макроиқтисодий таҳлил, таркибий ўзгаришлар, молия-банк тизими, давлат активларини бошқариш, рақобатни ривожлантириш, тадбиркорликни
қўллаб-қувватлаш ва камбағалликни қисқартириш масалалари котибиятининг 2021 йил 15 мартдаги 02/1-2631-сон топшириқ хатига асосан қуйидагиларни маълум қилади.
Сирдарё вилоятида қишлоқ хўжалигига мўлжалланмаган
ер участкаларини хусусийлаштириш “YERHUSUSIYLASHTIRISH” автоматлаштирилган ахборот тизими орқали амалга ошириб келинмоқда.
Эксперимент доирасида юридик ва жисмоний шахслардан 71 та аризалар келиб тушган, шундан 64 та ариза кўриб чиқилиб, 36 тасига
241,3 млн сўмлик ҳисобварақлари тўловини амалга ошириш учун берилган бўлиб, шу жумладан 15 та аризачи томонидан 166 млн сўм тўланган.
Ҳуқуқий Эксперимент натижасига кўра Ўзбекистон Республикасининг 2019 йил 13 августдаги ЎРҚ–552-сон “Қишлоқ хўжалигига мўлжалланмаган ер участкаларини хусусийлаштириш тўғрисида”ги Қонунига қуйидаги ўзгартиришлар киритиш таклиф этилади.
1. Қонуннинг 26-моддасига қуйидаги ўзгартириш ва қўшимчалар киритиш:
ер участкаларини хусусийлаштириш учун аризалар бериш ва уларни кўриб чиқишда, ер участкасини реализация қилиш жараёнларини оптималлаштириш мақсадида автоматлаштирилган тизимни жорий этиш;
Ўзбекистон Республикаси фуқароларига – жисмоний шахсларга тадбиркорлик ва шаҳарсозлик фаолияти учун берилган ер участкаларини хусусийлаштириш ҳуқуқини бериш;
хусусийлаштирилаётган ер участкаларини қийматини шакллантиришда, алоҳида ер участкаларига нисбатан дифференциал коэффициент ставкаларини қўллаш.

2. Қонунни қуйидаги янги нормалар билан тўлдириш:

“Ер участкаларини хусусийлаштириш тўғрисидаги туман (шаҳар) ҳокими томонидан бериладиган қарорни, ер участкасига эгалик ҳуқуқини берувчи Давлат ордери билан алмаштириш”.
3. Ер участкаларини хусусийлаштириш механизмларининг самарадорлигини ошириш бўйича ташкилий-техник тадбирларни амалга ошириш, шу жумладан:
ҳудудлар бош режа лойиҳаларини таҳлил қилиш ва мавжуд бош лойиҳалар асосида хусусийлаштирилиши мумкин бўлган ер участкалари
ва аҳоли яшаш пунктлари кесимида аниқлаш;
ер участкаларини хусусийлаштириш жараёнларини автоматлаштиришга қаратилган идоралараро интеграциялаш масаласи бўйича аниқ чора-тадбирлар қабул қилиш;
маълумотлар алмашиш жараёнини автоматлаштиришга имкон берувчи идоралараро информацион тизимларни интеграция қилиш масалаларида давлат бошқаруви органлари ўртасидаги ўзаро алоқаларни кучайтириш мақсадга мувофиқ.