Ўзбекистон Республикаси Халқ таълими вазирлигининг 2011 йил

Таълим муассасалари Педагогика кенгаши тўғрисида

НИЗОМ

Мазкур Низом таълим муассасаларидаги педагогик кенгашларнинг фаолиятини тартибга солади.

I.Умумий қоидалар

1. Барча турдаги таълим муассасаларида ўқув-тарбия жараёнини ривожлантириш, такомиллаштириш, муассаса фаолияти билан боғлиқ барча ташкилий масалаларни мувофиқлаштириш, педагогларнинг касб маҳорати ва ижодкорлигини ўстириш мақсадида Педагогика кенгаши фаолият кўрсатади.

2. Педагогик кенгаш ўз фаолиятини Ўзбекистон Республикаси Конституцияси ва “Болалар ҳуқуқларининг кафолатлари тўғрисида”ги қонуни, Ўзбекистон Республикаси Президентининг қарор, фармон ва фармойишлари, Ўзбекистон Республикаси Вазирлар Маҳкамасининг қарорлари, Халқ таълими вазирининг қарор ва буйруқлари, таълим муассасаси Устави ҳамда мазкур Низомга амал қилган ҳолда амалга оширилади.
3. Педагогик кенгаш коллегиал орган ҳисобланиб, педагогик жамоа, ота-оналар кўмитаси раиси, кутубхоначи, етакчи қўшимча таълим ходимлари, ҳомий ташкилотлар вакиллари, маҳалла кўмитаси раиси кенгаш аъзолари ҳисобланади.
4. Педагогика кенгаши қарорини бажариш ҳар бир мактаб ходими учун мажбурийдир.

II. Педагогика кенгашнинг асосий вазифалари

5. 
   Педагогика кенгашининг вазифаси қуйидагилардан иборат:
   

таълим муассасаси педагогик жамоа фаолиятини, ўқувчиларнинг эгаллаши лозим бўлган билим, кўникма ва малакаларини таъминлашда педагогик жамоа фаолиятини йўналтириш, ДТС талабларини бажаришни таъминлаш, ўқувчиларга таълим-тарбия бериш сифатини кўтариш чора–тадбирларини белгилаш;
ўқувчиларга таълим беришда ўқитишнинг илғор педагогик технологиялари ва ахборот-коммуникация воситаларидан фойдаланишини ўрганиш ва чора-тадбирларини белгилаш;
ўқувчиларни маънавий юксак, умуминсоний ва миллий руҳда, ўз ватани, халқини ардоқловчи, тинчлик ва барқарорликка қаратилган миллий қадриятлар асосида тарбиялаш юзасидан таклифлар бериш;
таълим муассасасини мақсад ва вазифаларидан келиб чиққан ҳолда уни ривожлантиришнинг истиқбол йўналишларини белгилаш;
таълим муассасаларида таълим-тарбия жараёнини ташкил этишда ва таълим самарадорлигини оширишда мақбул шарт-шароитлар яратишга қаратилган қарорлар қабул қилиш;
педагогик жамоанинг маълум йўналишлардаги фаолиятини таҳлил қилиш ва якуний хулоса бериш;
таълим муассасаси жамоаси учун ўз ваколати доирасида меъёрий талабларни ишлаб чиқиш, тасдиқлаш ва бажарилишини назорат қилиш.