Ўзбекистон республикаси халқ таълими вазирлиги республика таълим маркази

ЎЗБЕКИСТОН РЕСПУБЛИКАСИ ХАЛҚ ТАЪЛИМИ ВАЗИРЛИГИ
РЕСПУБЛИКА ТАЪЛИМ МАРКАЗИ


УМУМТАЪЛИМ МАКТАБЛАРИНИНГ 5-9-СИНФЛАРИДА ИНГЛИЗ ТИЛИДАН ҚЎШИМЧА МАШҒУЛОТЛАРНИ ТАШКИЛ
ЭТИШ БЎЙИЧА МЕТОДИК ТАВСИЯЛАР

Тошкент – 2011 йил.

Тузувчилар:	Республика таълим маркази методисти Ҳ. Тоирова
	Тошкент шаҳар Чилонзор туманидаги 178-сонли ихтисослаштирилган давлат умумтаълим мактаб инглиз тили фани ўқитувчиси Н. Н. Убайдуллаева
Тақризчилар:	Тошкент шаҳар Юнусобод туманидаги 17-сонли ихтисослаштирилган давлат умумтаълим мактаб метод бирлашма раҳбари З. Р.Салиходжаева
	Тошкент шаҳар Сергели туманидаги 6-сонли ихтисослаштирилган давлат умумтаълим мактаб инглиз тили фани ўқитувчиси О. Н. Мақсудова

Инглиз тили фанидан қўшимча машғулотларни ташкил
этиш бўйича методик кўрсатмалар.

Мустақиллик шарофати билан Ӯзбекистон дунё бозорига чиқди, хорижий мамлакатлар, халқаро ташкилотлар билан бевосита ҳамкорлик ишлари ривожланди. Бутун жаҳон ҳамжамиятидан ўзига муносиб ўрин эгаллашга интилаётган ўз буюк келажагини қураётган халқимиз учун хорижий тилларни билишга бўлган қизиқиш кучайди.

Ҳаёт тараққий топиб, илму-фаннинг янги ютуқлари жадаллик билан турмушимизга кириб келаётган ҳозирги даврда ёш авлод радио, телевизор, аудио-видео мосламаларнинг турли хиллари, сон-саноқсиз газета журналлардан ташқари компьютер, уяли алоқа ва интернет хабарларидан ҳам фойдаланиш имкониятига эгадир.
Бугунги кунда таълим-тарбия тизимида ахборот-коммуникация технологияларидан самарали фойдаланиш, таълим муассасаларида интернет хизматини жорий этишга эътибор кучайтирилди. Бунинг учун аввало, ўқувчиларнинг интернетдан мустақил равишда маълумотлар олиши учун инглиз тилини билиши лозим.
Инглиз тилини ўқитишни нутқ фаолиятининг тўрт тури Давлат таълим стандарти талаблари асосида ўқий олиш, эшитганларини тушуниш, гапира олиш, таржима қила олиш ўзаро боғланган ҳолда ривожлантириб борилади.
Шунинг учун умумтаълим мактабларида ўқувчиларни фақат дарс жараёнидагина эмас, дарсдан ташқари вақтларда ҳам инглиз тили билан шуғулланишга жалб қилишимиз лозим. Бунинг учун ўқувчиларнинг қизиқишлари ва эҳтиёжлари асосида турли хил машғулотларни, секцияларни ташкил этиш мақсадга мувофиқдир.
Ўқувчиларнинг умумий ўрта таълим мактаблари ўқув дастури асосида олган билимларини мустаҳкамлаш, кенгайтириш, нутқини ривожлантириш, тил ўрганишга бўлган қизиқишларини ошириш, назарий олган билимларини амалиётда қўллай олиш, мақсадида умумий ўрта таълим мактабларида қўшимча машғулотларни ўтиш тақозо этади.
Қўшимча машғулотлар 17 соатга мўлжалланган бўлиб, ўқув йили давомида икки ҳафтада 1 соат ёки ўқув йилининг иккинчи ярим йилида ҳафтасига 1 соатдан ўтказиш режалаштирилди.
Қўшимча машғулотлар учун ўқув соатлари 5-6-7-синфларида тўгарак машғулотлари ҳисобидан, 8-9-синфларда ҳаракатдаги ўқув режада берилган мактаб ихтиёридаги соатлари ҳисобидан ажратилади.
Қўшимча машғулотларнинг самарадорлигини ошириш учун ўқитувчи ўқувчиларнинг билиш фаолиятини фаоллаштирадиган, мантиқий, мустақил ва ижобий фикр юритиш кўникмаларини ривожлантиришга имкон берадиган ўқитиш методлари ва шаклларидан фойдаланиши тавсия этилади.
Қўшимча машғулотларда ўқувчиларнинг мустақил ва ижодий ишларига кенг ўрин бериш баробарида маъруза, семинар, амалий машғулотлар, экскурсиялардан фойдаланилади.