Ўзбекистон республикаси фанлар академияси

Тадқиқотнинг предмети сифатида Хоразм минтақасидаги ўсимлик номларининг лингвистик хусусиятлари танланган.
Тадқиқотнинг усуллари. Диссертацияда таҳлилнинг тавсифий, тарихий-қиёсий ҳамда тарихий-этимологик усулларидан фойдаландик. Чунки Хоразм шеваларидаги фитонимлар, бир томондан, замонавий (синхрон) материал ҳисобланса, иккинчи томондан, улар мазкур ҳудудга хос бўлган ўта қадимий сўзлардир.
Маълумки, туркий халқлар луғат таркибида муайян даражада муштараклик мавжуд. Бу муштаракликни ҳисобга олган ҳолда қиёсий номшуносликнинг тадқиқ усулларидан ҳам фойдаланишни мақсадга мувофиқ деб билдик.
Тадқиқотнинг илмий янгилиги қуйидагилардан иборат:

• 
  Хоразм минтақасидаги фитонимлар илк бор монографик тарзда таҳлил қилинган;
  
• 
  фитонимлар мавзуий-семантик жиҳатдан гуруҳларга ажратилган;
  
• 
  фитонимлар тарихий-этимологик жиҳатдан тасниф қилинган;
  
• 
  фитонимларнинг генетик таҳлилига оид кузатишлар баён қилинган;
  
• 
  фитонимларнинг аталиш мотивларига кўра турлари белгиланган;
  
• 
  соҳага оид баъзи илмий терминлар муомалага киритилган.
  

Тадқиқотнинг амалий натижаси қуйидагилардан иборат:

• 
  фитонимия бўйича тўпланган материаллар, қўйилган муаммоларни тадқиқ этиш натижасида чиқарилган хулоса ва умумлаштирилган фикрлар ҳозирги ўзбек тилшунослиги, ўзбек диалектологияси учун энг муҳим зарурий, илмий маълумот бериши, тадқиқотлар яратишда манба бўлиб хизмат қилиши, лексикология, ономастика, диалектология фанларини ўқитишда амалий жиҳатдан ёрдам бериши асосланган;
  
• 
  фитонимлар тадқиқи натижалари ономастика, диалектология, ботаника бўйича тузилган луғатларни янада бойитишда материал ва манба сифатида хизмат қилиши кўрсатилган;
  

Тадқиқот натижаларининг ишончлилиги таҳлилга тортилган материаллар ўзбек тили табиатидан келиб чиққан ҳолда, хулосалар қилиш имконини берганлиги, асослилиги, методологик мукаммаллиги, шунингдек, қўйилган масалаларнинг аниқлиги билан изоҳланади.