Ўзбекистон республикаси ёшларининг

ЎЗБЕКИСТОН РЕСПУБЛИКАСИ ЁШЛАРИНИНГ
ЧАҚИРУВГА ҚАДАР БОШЛАНҒИЧ ТАЙЁРГАРЛИГИ ТЎҒРИСИДА НИЗОМ


1- БОБ
УМУМИЙ ҚОИДАЛАР


1. Чақирувга қадар бошланғич тайёргарлик чақирилувчиларни Ўзбекистон Республикаси Қуролли Кучлари сафидаги ҳарбий хизматга тайёрлаш тизимининг таркибий қисми саналиб, «Умумий ҳарбий мажбурият ва ҳарбий хизмат тўғрисида»ги Ўзбекистон Республикаси Қонунига мувофиқ ташкиллаштирилади ва олиб борилади.
Чақирувга қадар бошланғич тайёргарлик жараёнида ўқувчилар:
республикани ҳимоя қилиш – давлатнинг ҳар бир фуқароси зиммасидаги муқаддас бурч эканлиги, Ўзбекистон Республикаси Конституциясининг 52, 125 ва 126- моддаларини теран англаб етишлари;
Ўзбекистон Республикасининг «Умумий ҳарбий мажбурият ва ҳарбий хизмат тўғрисида»ги Қонуни, давлат мудофааси ва миллий хавфсизлигини таъминлаш соҳасидаги бошқа қонун ҳужжатларининг асосий талабларини ўрганиб чиқишлари;
Ўзбекистон Республикаси Қуролли Кучларининг асосий вазифаси, ҳарбий хизматнинг республика фуқароси зиммасидаги конституцион бурч сифатидаги аҳамияти, Ҳарбий қасамёд ва умумқўшин низомларда баён этилган асосий талабларни англаб етишлари;
фуқаро муҳофазаси асосларини тасарруф этишлари, жабрланганга биринчи тиббий ёрдам кўрсатиш кўникмаларини амалий ўзлаштириб олишлари;
ҳарбий қисмлар ихтиёридаги қурол-аслаҳа ва жанговар техниканинг асосий тактик ва техник тавсифлари, ҳарбий хизматчиларнинг кундалик ҳаёти ва хизмат фаолияти билан танишиб чиқишлари;
Ўзбекистон Республикаси Қуролли Кучлари сафига чақирилгач, замонавий қурол-аслаҳа ва ҳарбий техника намуналарини қисқа муддатларда ўзлаштириб олишга шай бўлишлари лозим.
2. Чақирувга қадар бошланғич тайёргарлик, шу жумладан фуқаро муҳофазаси бўйича тайёргарлик ўқув дастурига киритилган мажбурий фан бўлиб, ўрта махсус ва ўрта касб-ҳунар таълими муассасаларида чақирувга қадар тайёргарлик фани ўқитувчилари томонидан ўқувчиларнинг битирув йили арафасидаги курслардан бошлаб ўтилади.
Таълимот ниҳоясида чақирувга қадар бошланғич тайёргарлик фанига оид билимларига якуний қониқарсиз баҳо белгиланган шахсларга ўрта-махсус, касб-ҳунар таълим муассасасини тамомлагани ҳақидаги диплом расмийлаштириб берилмайди.
Чақирувга қадар тайёргарлик фани бўйича билим ва кўникмаларининг савияси паст бўлган, шунингдек, таҳсил кўрган таълим муассасасида чақирувга қадар бошланғич тайёргарликдан ўтмаган чақирилувчилар бундай тайёргарликдан Қуролли Кучлар сафига чақирилишларидан олдин Қорақалпоғистон Республикаси Вазирлар Кенгаши, вилоят, туман ва шаҳар ҳокимиятлари томонидан таъсис этилган мудофаа-спорт соғломлаштириш лагерларида қўшимча равишда ўтишлари мумкин.