Ўзбекистон Республикаси Давлат солиқ қўмитаси 2019 йилда солиқ қонунчилигига киритилаётган ўзгаришлар юзасидан

КЎЧМАС МУЛК ИЖАРА ШАРТНОМАЛАРИНИ ДАВЛАТ СОЛИҚ ХИЗМАТИ ОРГАНЛАРИДА ҲИСОБГА ҚЎЙИШ ВА ЖИСМОНИЙ ШАХСЛАР УЧУН ДАРОМАД СОЛИҒИНИ ҲИСОБЛАШ
ТАРТИБИ

Ўзбекистон Республикаси Президентининг 2018 йил 25 майдаги ПҚ-3741-сон “Низоларнинг олдини олишга қаратилган институт сифатида нотариат тизимини янада такомиллаштириш чора-тадбирлари тўғрисида”ги қарорига мувофиқ 2019 йил 1 январдан бошлаб ижара шартномаларини давлат солиқ хизмати органларида мажбурий ҳисобга қўйиш тартибини ўрнатиш орқали кўчмас мулкни ижарага бериш ва текин фойдаланиш шартномаларини мажбурий нотариал тасдиқлаш бўйича талаб бекор қилинди.

Ўзбекистон Республикаси Адлия вазирлигида 2018 йил 11 октябрда 3077-сон билан рўйхатга олинган Ўзбекистон Республикаси Давлат солиқ қўмитасининг 2018 йил 15 августдаги

2018-65-сон қарори билан “Кўчмас мулк ижара шартномаларини давлат солиқ хизмати органларида мажбурий ҳисобга қўйиш тартиби тўғрисида”ги низом тасдиқланди.


Давлат солиқ хизмати органлари 2019 йил 1 январдан бошлаб ташқи манбалар асосида декларация қилинадиган даромадлар бўйича жисмоний шахслардан олинадиган даромад солиғини ҳисоблаш тарзида солиқ тўловчиларга сервис хизматлари кўрсатади

Эндиликда кўчмас мулкини ижарага бермоқчи бўлган юридик ва жисмоний шахслар ўзларига мулк ҳуқуқи асосида тегишли бўлган турар ёки нотурар мулкларини ижарага беришда икки томонлама ижара шартнома тузишлари ва шартномани давлат солиқ хизмати органларида ҳисобга қўйишлари шарт.




Ижарага берувчи ёки унинг вакили (ишончли бошқарувчи) кўчмас мулк ижара шартномасини шартнома тузилган кундан эътиборан ўн кундан кечиктирмай давлат солиқ хизмати органида ҳисобга қўйиши шарт.




Ижара шартномасини солиқ органларида ҳисобга қўйиш иккита усулда:



Давлат солиқ қўмитасининг MY.SOLIQ.UZ сайтидаги «Ижара шартномаларини ҳисобга олиш» хизмати орқали;

бевосита жисмоний шахснинг доимий яшаш, юридик шахснинг давлат рўйхатидан ўтган жойидаги давлат солиқ инспекцияларига ташриф буюрган ҳолда белгиланган шаклдаги сўровнома тақдим этиш орқали амалга оширилади.
Сўровномада ижарага берувчи ва олувчи тўғрисидаги (паспорт cерияси ва рақами, юридик шахснинг номи) маълумотлар, идентификация рақами (СТИР), яшаш жойи (юридик манзили) ёзилади.