Ўзбекистон республикаси адлия вазирлиги тошкент давлат юридик институти шорахметов шоакбар шорустамович

230-м о д д а. Сиртдан чиқарилган ҳал қилув қарорини
қайта кўриш ҳақидаги аризанинг мазмуни


Сиртдан чиқарилган ҳал қилув қарорини қайта кўриш ҳақидаги аризада қуйидагилар бўлиши керак:

1. 
   сиртдан ҳал қилув қарори чиқарган суднинг номи;
   
2. 
   ариза бераётган тарафнинг номи;
   
3. 
   суд мажлисига узрли сабабларга кўра келмаганликдан далолат берувчи ҳолатлар рўйхати ва уларни тасдиқловчи далиллар, шунингдек сиртдан чиқарилган ҳал қилув қарори­нинг мазмунига таъсир кўрсатиш мумкин бўлган далиллар рўйхати;
   
4. 
   ариза берувчи тарафнинг илтимоси;
   
5. 
   аризага илова қилинган материалларнинг рўйхати.
   

Сиртдан чиқарилган ҳал қилув қарорини қайта кўриш ҳақидаги ариза тараф ёки унинг вакили томонидан имзо­ланади.
Сиртдан чиқарилган ҳал қилув қарорини қайта кўриш ҳақидаги ариза ишда иштирок этувчи шахсларнинг сонига мутаносиб миқдорда нусхалари билан судга тақдим этилади. Ариза берганлик учун давлат божи тўланмайди.


1. Ушбу қоидада назарда тутилаётган ҳал қилув қарорини қайта кўриш ҳақидаги аризанинг мазмуни фуқаролик ишларини даъво, алоҳида тартибда, шунингдек давлат органлари ва мансабдор шахс­ларнинг хатти-ҳаракатлари (қарорлари) устидан судга шикоят аризалар бериш каби умумий белгиланган процессуал қоидаларга амал қилган ҳолда тузилса-да, бироқ айрим хусусиятларини ҳам эътиборга олиш зарур бўлади.
Сиртдан кўрилган иш юзасидан суднинг чиқарган ҳал қилув қароридан норози тараф уни қайта кўриш учун қонунда кўрсатил­ган тартибда ариза билан тегишли судга мурожаат этганда ФПКнинг 230-моддасида кўрсатилган қоидаларга амал қилишлари лозим.
Аризанинг 1-бандида суднинг номини кўрсатилишидан мақсад суднинг ишни кўришга ваколати бор ёки йўқлигини, 2-бандида тарафлар ҳақидаги маълумотларни талаб қилиниши эса, ариза берган тараф бундай ҳуқуқдан фойдаланишга ҳақлими ёки йўқми деган саволга аниқлик киритишга учун киритилгандир.
Булардан ташқари, ФПКнинг 230-моддаси учинчи бандида, агар суд мажлисига узрли сабабларга кўра келмаганликларини асослаб бериш учун тегишли далиллар келтириш тўғрисидаги қоидалар ишни шу судда кўриш учун асос бўлиши сиртдан иш кўришнинг ўзига хос хусусиятларидан ҳисобланади. Яна бир хусу­сияти шундаки, ариза берганлик учун давлат божи тўланмас­лигидир.
Қонунда белгиланган талабларга риоя қилмаслик аризани кўрмасдан қолдириш учун асос бўлиши мумкин.
2. Юқорида баён қилганимиздек, аризани кўрмасдан қолдириш учун қатор ҳолатлар асос бўлиши мумкин, суд бу камчиликларни бартараф этиш учун унинг ҳолатига қараб муддат тайинлаши лозим.