Ўзбекистон миллий университети ҳузуридаги илмий даражалар берувчи dsс

Тадқиқотнинг республика фан ва технологиялари ривожланишининг устувор йўналишларига боғлиқлиги. Диссертация тадқиқоти Ўзбекистон Республикаси фан ва технологиялари ривожланишининг I. «Ахборотлашган жамият ва демократик давлатни ижтимоий, ҳуқуқий, иқтисодий, маданий, маънавий-маърифий ривожлантиришда инновацион ғоялар тизимини шакллантириш ва уларни амалга ошириш йўллари» устувор йўналишига мувофиқ бажарилган.
Муаммонинг ўрганилганлик даражаси. Метафораларнинг фалсафий-назарий асослари, мантиқий таҳлили, ёндош кўчимлардан фарқли жиҳатлари, орноментал, праксеологик хусусиятлари ҳамда фалсафий парадигмасини аниқлаш борасида Н.Арутюнова, М.Блек, П.Рикёр, Э.Кассирер, Р.Якобсон ва Э.МакКормаклар илмий тадқиқ қилганлар².
Шунингдек, Ж.Лакофф, М.Жонсон, Е.Гогоненкова, Е.Акишина, Н.Шарбонел, Г.Ермоленко, И.Полозова, М.Merleau-Ponty, V.Pustovalova, D.Montminy, Е.Решетникова, Е.Малышкин ва Д.Ашуровалар³ концептуал метафора тушунчасининг когнитив, прагматик, лингвомаданий жиҳатларини очиб берганлар. Таржимашунос олимлар Л.Бархударов, А.Швейцер, С.Влахов, С.Флорин, В.Виноградов, А.Федоров, Ғ.Саломов, Қ.Мусаев, Р.Файзуллаева, Х.Хамраев, М.Холбеков, Ш.Сафаров, И.Тўхтасинов, О.Каримов, С.Сирожиддинов, П.Нишонов, М.Саттарова, З.Салиева, Р.Шириновалар таржиманинг грамматик, лексик, прагматик, стилистик, ҳамда лексикографик муаммоларини ўрганганлар⁴. Ўзбек тилшунослари Ш.Раҳматуллаев, М.Миртожиев, М.Мамадалиева ва Г.Қобулжоновалар ўзбек тили материали асосида метафоранинг миллий-маданий, лисоний, семантик ҳамда когнитив хусусиятларини тадқиқ этишган⁵.
Бироқ замонавий ўзбек адиблари асарларининг французча таржимасида концептуал метафораларнинг миллий-маданий ва лингвокогнитив хусусиятлари ўрганилмаган ҳамда метафоралар таржимасининг замонавий тамойилларини ишлаб чиқиш масалалари қиёсий аспектда тадқиқ қилинмаган.
Диссертация мавзусининг диссертация бажарилган олий таълим муассасасининг илмий тадқиқот ишлари билан боғлиқлиги. Мазкур тадқиқот Мирзо Улуғбек номидаги Ўзбекистон Миллий университетида олиб борилаётган «Таржимашунослик ва тилшуносликнинг долзарб масалалари» мавзусидаги илмий тадқиқот режасининг таркибий қисми сифатида бажарилган.