Ўзбекистон давлат жисмоний тарбия институти

12. MUSOBAQA O’TKAZISHNING ILMIY-TASHKILIY ASOSLARI

Sport musobaqalarini tashkil qilish va o’tkazish shu musobaqalarga rahbarlik qiluvchi (sport federatsiyasi, tashkiliy qo’mita va h), mezbon tashkilotchi, hakamlar uyushmasi hamda nazoratchi (ekspert) hakamlarga katta mas’uliyat yuklaydi. Ular musobaqa o’tkazish joylarini (sport saroylari, kommunikatsion, tibbiy va yordamchi honalar) rasmiy musobaqa qoidalari, musobaqa Nizomi va boshqa me’yoriy standartlar talablariga muvofiq tayyorlash ekspertiza va sinovdan o’tkazish choralarini ko’rish tadbirlarini amalga oshiradi. Tamoshabinlar, ishtirokchi sportchilar, trenerlar, tibbiy va xavfsizlik xizmati xodimlari, akkreditatsiyadan o’tgan barcha ommaviy axborot vositalari vakllariga barcha qulayliklar yaratilishi mezbon tashkilotchilar tomonidan ta’minlanadi.

12.1. Musobaqa o’tkazishga tayyorgarlik ko’rish

Musobaqalar muvofiq mutasaddi tashkilot (yoki tashkilotlar) tomonidan tasdiqlangan yillik musobaqa taqvim rejasiga asosan o’tkaziladi. Odatda musobaqa o’tkazish joyi (mamlakat, viloyat, shahar va h) va vaqti shu taqvim rejasida qayd etiladi.

Musobaqaning nomi, maqsad va vazifalari, o’tkazish joylari va muddatlari, musobaqada ishtirok etish huquqiga ega jamoalar (klublar, terma jamoalar), musobaqada ishtirok etish shartlari, bosh hakam, musobaqaga rahbarlik qiluvchi tashkilot, musobaqa shart-sharoitlarini ta’minlovchi mezbon tashkilot, musobaqa o’tkazish va o’rinlarni aniqlash tizimi, rag’batlantirish kabi masalalar musobaqa Nizomida batafsil ifodalanadi.
Musobaqa o’tkazishdan avval nazoratchi (ekspert) hakam (yoki hakamlar) musobaqa o’tkazish joyini qabul qilingan ilmiy-texnologik vositalar (o’lchov asboblari) yordamida ko’zdan kechiradi. Jumladan, musobaqa o’tkaziladigan sport inshoatida havo namligi, harorat, atmosfera bosimi, tabiiy va sun’iy yorug’lik, maydon chiziqlari, to’r va ustinlar, o’rindiqlar, bo’shlik zonalar va boshqa ko’rsatgichlar belgilangan me’yoriy standartlar asosida ekspertizadan o’tkaziladi.
Sportchilarga mo’ljallangan echinish-kiyinish, yuvinish, gigienik, kommunikatsion, tibbiyot va xakamlar xonalari nazoratdan o’tkaziladi.
Amalga oshirilgan ekspert – nazorat tadbirlari natijalariga ko’ra xulosa tayyorlanadi va bu haqida musobaqa o’tkazuvchi mas’ul tashkilot rahbariga ma’lumot beriladi.