Ўзбекистон давлат жисмоний тарбия институти

10.3.1. Tezkorlikni tarbiyalash

Tezkorlik deb muayyan faoliyatni qisqa muddat ichida ijro etilishiga aytiladi. Tezkorlik namoyon bo’lishining uchta asosiy shakllari mavjuddir:

1. Harakat reaktsiyalarining latent (yashirin) vaqti.
2. Ayrim harakatlar tezligi (tashqi qarshilik kichik bo’lganda).
3. Harakatlar chastotasi.
Tezkorlik namoyon bo’lishining shakllari bir-biriga nisbatan bog’liq emas.
Ko’rsatib o’tilgan uchta shaklning birgalikda kelishi tezkorlik namoyon bo’lishining barcha hollarini belgilaydi. Biroq murakkab-koordinatsion yaxlit harakatlardagi tezlik faqat tezkorlik darajasiga emas, balki boshqa sabablarga ham bog’liq. SHuning uchun yaxlit harakat tezligi kishining tezkorligini faqat bilvosita ifodalanadi.
Kishining tezlik qobiliyatlari umuman o’ziga xos bo’ladi. Faqat bir-biriga o’xshash harakatlardagina tezkorlik to’g’ridan-to’g’ri yoki bevosita bir-biriga ko’chishi mumkin.
Tezkorlikning fiziologik va bioximik asoslari. Reaktsiyaning latent vaqti beshta tarkibiy qismdan iborat:
1) retseptorda qo’zg’alishning paydo bo’lishi;
2) qo’zg’alishni markaziy nerv sistemasiga uzatish;
3) qo’zg’alishning nerv yo’llari bo’ylab o’tib borishi va effektor signal hosil bo’lishi;
4) signalning markaziy nerv sistemasidan mushakka o’tkazilishi;
5) mushakning qo’zg’alishi va unda mexanik faollikning paydo bo’lishi.
Maksimal tezlikda bajariladigan harakatlar fizilogik xususiyatlarga ko’ra sustroq harakatlardan farq qiladi. Bular orasidagi eng muhim farq shundan iboratki, harakatlarni maksimal tezlikda bajarish davomida sensor bog’lanishlar hosil bo’lishi qiyinlashadi: reflektor yoy impul’slarni tashib ulgurolmaydi. Tezlik juda katta bo’lganida harakatlarni etaralicha aniqlik bilan bajarishning qiyinligi mana shu bilan bog’liqdir.
Oddiy reaktsiya tezkorligini tarbiyalash. Xarakatlantiruvchi reaktsiya tezligi ta’sirga javob berishning latent vaqti bilan belgilanadi. Reaktsiyalar oddiy va murakkab bo’ladi. Oddiy reaktsiya oldindan ma’lum bo’lgan signalga ilgaridan ma’lum bo’lgan harakat bilan javob berishdir.
Tezkorlikning juda ko’p o’tishi (boshqa biror harakatga o’tishi) oddiy reaktsiyalar uchun xarakterlidir: ayrim vaziyatlarda tezda biror qarorga keluvchi kishilar boshqa sharoitdarda ham tezroq biror fikrga keladilar. Tez bajariladigan xilma-xil mashqlar bilan shug’ullanish oddiy reaktsiya tezkorligini yaxshilaydi.
Harakatlantiruvchi reaktsiya tezkorligini anchagina yaxshilash g’oyat murakkab vazifadir.
Oddiy reaktsiya tezkorligini tarbiyalashda bir necha usullardan foydalaniladi. Bulardan eng ko’p tarqalgani to’satdan paydo bo’ladigan signalga yoki tevarak-atrofdagi vaziyatning o’zgarishiga javoban mumkin qadar tezroq reaktsiya ko’rsatish usulidir. Bu usul yangi shug’ullanuvchilar bilan o’tkaziladigan mashg’ulotlarda tez orada ijobiy natijalar ko’rsatadi. Afsuski, shundan keyin reaktsiya tezkorligi stabillashib qoladi va uning yaxshilanishi ancha qiyin bo’ladi.
Reaktsiya tezkorligi katta ahamiyatga ega bo’lgan hollarda uni takomillashtirish uchun maxsus usullardan foydalaniladi. Bu usullardan biri – reaktsiya tezkorligini engillashtirilgan sharoitlarda va uni keyingi harakat tezligini ayrim-ayrim takomillashtirishdan iboratdir.
Reaktsiyaning latent vaqti reaktsiya ko’rsatishdan oldingi ratsional xatti-harakat hisobiga birmuncha yaxshilanishi mumkin. Jumladan, diqqatning yo’nalishi ahamiyatga ega bo’ladi: agar diqqat bajarilajak harakatga qaratilgan bo’lsa (reaktsiyaning motor tipi), u holda reaktsiya ko’rsatish vaqti diqqat signalni idrok qilishga (reaktsiyaning sensor tipi) qaratilganligidan ko’ra kamroq bo’ladi. Mushaklar bir oz kuchlanganda ham reaktsiya tezkorligi ortadi. Reaktsiya tezkorligi, shuningdek, signalni kutish vaqtiga ham bog’liq: dastlabki va ijro komandalari orasidagi optimal vaqt 1,5 sek.ga yaqindir.