Zamonaviy texnologik uslublar

Zamonaviy texnologik uslublardan foydalanishining turli xil ko‘rinishlari va natijalari

Bugungi kunda ayrim xorijiy ommaviy axborot vositalari bizga o‘z mafkurasini singdirishga urinayotganini sezish qiyin emas. Bu haqda Birinchi Prezidentimiz Islom Karimov shunday deydi: «Sir emas, ba’zan beozorgina bo‘lib tuyulgan musiqa, oddiygina multfilm yoki reklama lavhasi orqali ham ma’lum bir mafkuraviy maqsadlar va intilishlar ifodalanadi». Mazkur holat ham milliy g‘oya targ‘ibotining ta’sirchanligini oshirishni hamda har qanday mafkuraviy tahdidlarga nisbatan ogoh bo‘lishni taqazo etadi. Bu esa targ‘ibot-tashviqot ishlariga yangicha texnologiyalar, yondashuvlar, uslub va vositalarni jalb etishni talab qiladi.

Yoshlar ongiga yot g‘oya va buzg‘unchi mafkuralarni singdirishga qaratilgan axborot-psixologik ta’sirdan ko‘zlangan maqsadlar quyida qeltirilgan:
 yoshlar onggida siyosiy va mafkuraviy beparvolikni hosil qilish;
yoshlarning ma’naviy-axloqiy ongini izdan chiqarish;
 «olomon» yoki «to‘da» ongini shakllantirish;
 davlatga nisbatan norozilik kayfiyatini tug‘dirish;
 mavjud tuzumga nisbatan ishonchsizlik keltirib chiqarish;
 tartibsizlikni vujudga keltirish;
 yoshlarni «zombi»ga aylantirish va h.k.