Замонавий қурилиш материаллари, буюмлари ва технологиялари

1. СОПОЛ МАТЕРИАЛЛАР ВА БУЮМЛАР

Ватанимизда жуда кўп тарқалган каолин, гилтупроқларнинг ўзи ва қўшимчалар билан ишлатиладиган гилтупроқлар сопол буюмлар ишлаб чиқариш учун зарур хом ашёдир. Гилтупроқ сув билан аралаштирилганда у хохлаган шакл бериш мумкин бўлган пластик лойга айланади. Ундан юқори ҳароратда пишириб ва турли қурилиш буюмлари, рўзғор анжомлари ҳамда меъморчилик буюмлари ишлаб чиқариш мумкин. У пиширилгандан сўнг қаттиқ ва сув таъсирига чидамли пишиқ сунъий тош материал ҳосил бўлади.

Ўзбекистон худудида сопол материал ва буюмлар ишлаб чиқариш эрамиздан 2-3 минг йил аввал кенг қўлланилган. Пишиқ ғиштдан II –III асрларда колонна асоси ва дераза эшиклар ўрнатиладиган жойларнинг перемичкаларини қуришда, IX асрдан бошлаб деворбоп материал сифатида фойдалана бошланган. Бу борада ота-боболаримизнинг эришган ютуқлари қай даражада бўлганлиги хақида Самарқанд, Бухоро, Хива ёдгорликлари далолат бериб турибди.
Деворбоб сопол буюмлар
Деворбоб сопол буюмлар қурилишда ишлатиладиган деворбоб буюмларнинг 50% ни ташкил этади. Зичлигига кўра деворбоб сопол буюмлар (ғишт, сопол тош) 3 қисмга бўлинади:

1. 
   Эффектив — зичлиги 1400 - 1450 кг/м³ дан кўп эмас, иссиқни яхши ушлаб тура оладиган;
   
2. 
   Шартли эффектив - 1450 - 1600 кг/м³;
   
3. 
   Оддий — 1600 кг/м³ дан катта.
   

Оддий пишиқ ғиштнинг ўлчамлари 250x120x65 мм бўлиб, қирралари тўғри, аниқ, юзаси силлиқ ва текис бўлиши керак. Томонлари 3 мм гача фарқ қилиши мумкин.
Модулли ғиштлар ўлчамлари 250x120x88 мм ва думалоқ ёки тўртбурчак ковакли бўлади. Мустаҳкамлигига қараб ғишт қуйидаги маркаларга бўлинади: 75; 100; 125; 150; 200; 250; 300.
Энг кўп тарқалган деворбоп материалларнинг турлари 3-5-расмларда келтирилган.



3-расм. Оддий пишиқ ғишт.


4-расм. Деворбоп материалларнинг янги турлари.

5-расм. Пардозбоп ғиштлар

Гилли черепица лойдан қолипга қуйилган, сўнгра пиширилган тўғри бурчакли плиткалар ёки новлар кўринишидаги қурилиш материалидир (6 – расм). У билан том ёпилади. Арзонлиги, чидамлилиги ва меъморий сифатлари жиҳатдан бошқа томбоп материаллардан қолишмайди.
Штампланган черепица, кўп новли тасмасимон черепица, тасмасимон ясси черепица ва том ўркачига ёпиладиган новсимон черепица кўп ишлатилади.
6-расм . Гилли черепица