Замонавий хорижий оав фанидан оралиқ назорат саволлари 1-вариант саволлари

ОАВ қонунчилиги: Ҳар бир радио ва телеканал орқасида давлат томонидан белгиланган махсус текшириш ҳамда таъсир ўтказиш кучлари мавжуд. Булар Британия Парламенти томонидан қабул қилинган қатор қонунлар асосида олиб борилади. 1997 йил апрель ойида ташкил этилган Broadcasting Standarts Comission яъни Радио ва телевидение Стандартлари Комиссияси, BBC Charter, Independent Television Comission ва Radio Autority — буларнинг ҳаммаси турли хил йўналишлардаги назорат ишларини олиб боришади. Газеталар ва журналларнинг тақдири эса бошқача. Давлат томонидан улар назорат қилинмайди, уларнинг устидан цензура ўрнатилмаган. Газета ёки журналларнинг муҳаррирлари ва мухбирлари мамлакат фукаролари бўйсунадиган умумий қонунлар олдида жавоб берадилар холос. Телевидение, радио ёки газета, журнал мухбирлари мудофаа ва халқаро алоқалар ҳамда шунга ўхшаш бошқа соҳалар бўйича ахборот йиғишда давлат томонидан қабул қилинган Official Secrets Act яъни Расмий Сирлар Қонуни доирасидан чиқиб кетмасликка мажбур.
Матбуоти: Буюк Британия газеталарини тарқаладиган ҳудуди, аудиториясининг умумий кўламига қараб миллий, худудий ва маҳаллий нашр турларига ажратиб тасниф қилиш мақсадга мувофиқдир. Буюк Британияда миллий турдаги газеталар ўз ичига ўнта тонгги ҳамда ўнта якшанба газеталарини қамраб олади. Мазкур нашрлардан тонгги газеталарнинг ҳафта давомидаги умумий нусхаси 12 млн.ни ташкил этса, якшанба кунининг ўзида чиқадиган ўнта миллий газетанинг адади 13 млн. нусхагача чиқиб кетади. Бу, албатта, миллий газеталарнинг мамлакат аҳолиси ўртасидаги нуфузини кўрсатади. Ҳудди шунингдек, “The Financial Times”, “The Sun”, “Guardian”, “Daily Mirror” сингари йирик миллий газеталар эса хорижий мамлакатларда ҳам чоп этиб, тарқатилади. Миллий газеталарни ўз услуби ва мавзу-мундарижасига кўра жиддий ва сариқ матбуотга ажратиш мумкин. Уларнинг кўпчилиги рангли ва кундалик сонларидан ташқари, шанба ёки якшанба кунлари турли иловалар ҳам нашр этишади. Миллий нашрлардан ташқари, яна бугунги кунда мамлакатда 1, 300дан зиёд ҳудудий ва маҳаллий газеталар ҳам чоп этилади. Ушбу газеталар мамлакатнинг марказий шаҳарларидан тортиб, кичик туманларда ҳам чиқарилади. Уларнинг чиқиш даврига кўра тонгги ва кечки кундалик газеталар, якшанбалик ва ҳафталик газеталарга ажратиш мумкин. Бу газеталарнинг 90 %и ўз он-лайн саҳифасига ҳам эгалигини таъкидлаш жоиз.