Yuridik ahamiyatga EGA hujjatlarning qonun hujjatlariga nomuvofiqligi to‘G‘risida huquqiy xulosa

YURIDIK AHAMIYATGA EGA HUJJATLARNING QONUN HUJJATLARIGA NOMUVOFIQLIGI TO‘G‘RISIDA HUQUQIY XULOSA
№ 1
1. Loyihaning turi
Buyruq.

2. Loyihaning nomi.

“Ishga qabul qilish to‘g‘risida”
3. Loyiha ishlab chiquvchisi va kiritilgan sana haqidagi ma’lumot.


O‘zbekiston Respublikasi Navoiy viloyati Navbahor tumani xalq ta’lim bo‘limi .21.10.2021
Navoiy viloyati Adliya boshqarmasi huzuridagi Navbahor tuman yuridik xizmat ko‘rsatish markaziga 2021 yilning 21 oktyabr kuni «E-Huquqshunos» elektron tizimi orqali Navoiy viloyati Navbahor tumani xalq ta’lim bo‘limi tomonidan “Ishga qabul qilish to‘g‘risida”gi buyruq loyihasi huquqiy ekspertizadan o‘tkazish va xulosa berishlik uchun kelib tushgan. Buyruqni o‘rganish davomida quyidagilar aniqlandi:
21-oktyabr 2021-yil Mamatov Zoir Faxriddinovich - Navbahor tuman xalq ta’limi bo‘limiga qarashli 19-umumiy o‘rta ta’lim maktabi xo‘jalik ishlari bo‘yicha direktor o‘rinbosari lavozimiga joriy yilning 20-oktabr sanasidan O‘zbekiston Respublikasi Mehnat Kodeksining 85-moddasiga asosan 3 (uch) oylik sinov muddati bilan ishga qabul qilishi belgilangan.
O‘zbekiston Respublikasi Mehnat Kodeksi 84-moddasida ishga qabul qilishda dastlabki sinov belgilangan bo‘lib:
Mehnat shartnomasi quyidagi maqsadda dastlabki sinov sharti bilan tuzilishi mumkin:
xodimning topshirilayotgan ishga layoqatliligini tekshirib ko‘rish;
xodim mehnat shartnomasida shartlashilgan ishni davom ettirishning maqsadga muvofiqligi haqida bir qarorga kelishi.
Dastlabki sinovni o‘tash haqida mehnat shartnomasida shartlashilgan bo‘lishi lozim. Bunday shartlashuv bo‘lmagan taqdirda xodim dastlabki sinovsiz ishga qabul qilingan deb hisoblanadi.
Homilador ayollar, uch yoshga to‘lmagan bolasi bor ayollar, korxona uchun belgilangan minimal ish joylari hisobidan ishga yuborilgan shaxslar, o‘rta maxsus, kasb-hunar ta’limi muassasalarining hamda oliy o‘quv yurtlarining tegishli ta’lim muassasasini tamomlagan kundan e’tiboran uch yil ichida birinchi bor ishga kirayotgan bitiruvchilari ishga qabul qilinganda, shuningdek xodimlar bilan olti oygacha muddatga mehnat shartnomasi tuzilib, ishga qabul qilinganda dastlabki sinov belgilanmaydi.
O‘zbekiston Respublikasi Mehnat Kodeksi 85-moddasida dastlabki sinov muddati berilgan bo‘lib:
Dastlabki sinov muddati uch oydan oshib ketishi mumkin emas. Vaqtincha mehnatga qobiliyatsizlik davri va xodim uzrli sabablarga ko‘ra ishda bo‘lmagan boshqa davrlar dastlabki sinov muddatiga kiritilmaydi.
O‘zbekiston Respublikasi Mehnat Kodeksi 87-moddasida dastlabki sinov muddati tugagunga qadar har bir taraf ikkinchi tarafni uch kun oldin yozma ravishda ogohlantirib, mehnat shartnomasini bekor qilishga haqlidir. Bunday holda ish beruvchi mehnat shartnomasini sinov natijasi qoniqarsiz bo‘lgandagina bekor qilishi mumkin.
Mehnat shartnomasini bekor qilish to‘g‘risida ushbu moddaning birinchi qismida nazarda tutilgan ogohlantirish muddatini qisqartirishga faqat shartnoma taraflarining kelishuvi bilan yo‘l qo‘yiladi.
Ushbu moddaning birinchi qismida nazarda tutilgan yoki mehnat shartnomasi taraflarining kelishuvi bilan belgilab olingan ogohlantirish muddati mobaynida xodim mehnatga oid munosabatlarni bekor qilish to‘g‘risida berilgan arizani qaytarib olishga haqlidir.
Agar dastlabki sinov muddati tugagunga qadar taraflardan birortasi ham mehnat shartnomasini bekor qilishni talab qilmagan bo‘lsa, shartnomaning amal qilishi davom etadi va bundan keyin uni bekor qilishga umumiy asoslarda yo‘l qo‘yiladi.
Yuqoridagi moddalarga asosan, ish beruvchi va xodim o‘rtasida mehnat shartnomasi tuzilmagan va sinov muddatlari haqida kelishuv ilova hujjatlarida keltirilmagan. MEHNAT KODEKSINING 84-MODDASIGA KO‘RA TOMONLAR DASTLABKI SINOV MUDDATINI SHARTNOMADA KO‘RSATMAGAN BO‘LSA SINOV MUDDATISIZ ISH QABUL QILINGAN BO‘LADI.
Yuqoridagilarni inobatga olib, huquqiy ekspertizadan o‘tkazish natijalariga ko‘ra:
XULOSA QILAMAN:
Navbahor tumani xalq ta’lim bo‘limi 2021 yil 21 oktyabr 433-kb-son “Ishga qabul qilish to‘g‘risida”gi buyrug‘i amaldagi qonun hujjatlariga nomuvofiq deb topilsin.