Yozef gaydn (1732-1809)

«Yil fasllari» oratoriyasi
Gaydnning vokal asarlari orasida oratoriyalar muhim o'rinlardan birini egallaydi. 70-yillarda «Toviyaning qaytishi» oratoriyasi yaratildi. Ushbu janrning eng yorqin va mahobatli asarlari kompozitor ijodining oxirida yozildi. Bular — «Dunyoning yaratilishi» (1798) va «Yil fasllari» (1800) oratoriyalaridir. Mazkur asarlar asosida-gullab-yashnayotgan tabiat kuchli manzaralari tasvirida inson shodligi va baxti mavzusi yotadi. Ularda janr-turmush unsurlari va ijodkorlik muhim rol o'ynaydi. «Yil fasllari» oratoriyasi Van Sviten librettosiga yozilgan, bu libretto ingliz yozuvchisi Jeyms Tomson sujetiga asoslangan. Unda qishloq hayoti, daladagi ishlar, go'zal tabiat manzaralari va Luka hamda Gannaning sevgisi ifodalangan. Oratoriya yil fasllariga monand bo'lgan to'rt qismdan iborat: bahor, yoz, kuz, qish. Butun asar falsafiy g'oya bilan yo'g'rilganki, unda inson hayoti davrlari — o'smirlik «Bahor», yoshlik «Yoz», yetuklik «Kuz», keksalik «Qish» navbat bilan almashadi. Oratoriyada dasturli izohli orkestr muqaddimasi muhim o'rin egallaydi. Jumladan, birinchi qism «Bahor» muqaddimasining izohi quyidagicha: «Muqaddima qishdan bahorga o'tishni ifodalaydi». Bu sonata allegrosi shaklida, vivace tezligida, largo tempidagi to'rt taktli ulug'vor kirish qismi bilan boshlanuvchi yorqin simfonik manzaradir. Bosh partiya sol minor tonalligida yozilgan. U jadal tempda sadolanadi, ko'plab lad-tonal og'ishmalar va kamaytirilgan garmoniyalar orqali bo'ron va to'fonlar bilan qishdan erta bahorga o'tishning davrini ifodalaydi.
Yordamch i partiya si bemol majorda yozilgan va intonatsiya jihatidan bosh partiya mavzusi bilan bog'langan. Mavzu major ladi, tiniq orkestrovka va tonal turg'unligi tufayli yorqin ranglar bilan ajralib turadi.
Birinchi qism bahorni kuylashga bag'ishlangan. U kirish qismining musiqasiga qarama-qarshi. Bahorni olqishlayotgan dehqonlar xori xorovod qo'shig'i ruhida yozilgan. Uning major (sol major) tonalligida yozilgan yorqin musiqasi ajralib turadi.
Xor murakkab uch qismli shaklga ega. Qarama-qarshilik minor (do minor) ladi va musiqaning dramatik hayajonli xarakteri (erkak ovozlar bo'ron va to'fonlar haqida kuylashadi) bilan bo'rttirilgan. Avstriya dehqonlarining xalq qo'shiqlarini eslatuvchi Simon ariyasi dadil, quvnoq sadolanadi. U do majorda, uch qismli shaklda yozilgan. Ariyaning birinchi qismida orkestr jo'rligida Gaydnning ommalashib ketgan 94-simfoniyasi ikkinchi qismining mavzusi yangraydi.
Ariyaning o'rta qismi o'zida lad-tonal ziddiyatini (mi bemol major va do minor) mujassamlashtirgan. Kompozitor bahor kelishi bilan tabiat qanday uyg'onishi, odamlar quyosh va yorug'lik kelishidan qanday xursand bo'lishlarini tasvirlaydi. Oratoriyaning bi-rinchi qismini ulug'vor xarakterdagi qudratli xor fagasi yakunlaydi.
Ikkinchi qism «Yoz» — tabiatdagi turli hodisalarni tasvirlashga bag'ishlangan. Bu qishloqdagi tongdan to oqshom tushgunga qadar bo'lgan yoz kunini tasvirlanishidir. Ushbu bo'limning aksariyat nomerlari uchun osoyishtalik kayfiyati xosdir. Dramatizm unsurlarini olib kiruvchi momaqaldiroqning tasvirlanishi keskin qarama-qarshilik olib kiradi. Do minor tonalligidagi qisqa kirish tonggi shafaqni tasvirlaydi.
Muqaddima Adajio sur'atida sadolanadi. Kuy hali tarqab ulgurmagan tun qorong'isi manzarasini tasvirlovchi, sfortsando zarblarida to'xtashlari bo'lgan xromatizmlar bilan ajralib turadi. Uzoqdan podani dalaga olib chiqqan cho'pon nayining sadolari eshitiladi. Dehqonlar ulug'vorlik bilan ko'tarilayotgan quyoshni olqishlaydilar.
Quyoshning chiqishini Gaydn oddiy va favqulodda ifodali vositalar bilan tasvirlagan. Bular ovozlarning asta-sekin qo'shilib borishi bilan yuqoriga yo'nalgan xromatik ohanglar va dinamikaning pianodan to fortissimogacha kuchaytirilishidir. Asardagi markaziy yakkaxon nomerlar Luka va Gannaning ariyalaridir. Jumladan, Luka o'z ariyasida yozning darmonni qurituvchi jaziramasi haqida kuylaydi. Gannaning ariyasida gullab-yashnagan tabiat qo'ynidagi quvonch va qalb xotirjamligi tasvirlab berilgan. Ariya uchta bir-biriga qarama-qarshi bo'lgan qismlar — accompognato turidagi rechitativ, og'ir va mohirona passajlar bilan jonlantirilgan tezkor bo'limlardan iborat. Simon, Luka va Gannaning rechitativida tabiatning momaqaldiroq oldidan sukunati tasvirlanadi. Uzoqlashib borayotgan momaqaldiroq gumburlashini litavralarning arang eshitiluvchi sadolari ifodalaydi. Sukunat boshlanishini pianissimoda ijro etiluvchi pauzali keskin akkordlar (torli cholg'ularning pizzicatosi) tasvirlab beradi. Xorda («Biz tomon momaqaldiroq yaqinlashar») litavralar tremolosi momaqaldiroq gumburlashini, fleytalarning (yuqori ovozlardagi) ijrosi esa chaqmoq chaqishini aks ettiradi.
Ulkan simfonik manzara fonida xorning xitob va luqmalari tug'yonga kelgan tabiatdan g'ulg'ulaga tushgan odamlarni chulg'ab olgan iztirob tuyg'ularini aks ettiradi. Bu xor sahnasini qo'shaloq fuga yakunlaydi. Birinchi mavzu xromatik tarzda pastga yo'nalgan va oktava doirasida chegaralangan. Ikkinchi mavzu — to'lqinsimon va notinch sadolanadi.
Bo'ron to'xtagandan so'ng, quyosh yana charaqlab chiqadi va tabiatda osoyishtalik hukm sura boshlaydi. Xor sahnasi do majorda yakunlanadi va ko'pincha Betxovenning «Pastoral simfoniyasi»dan mashhur «Momaqaldiroq»ni eslatadi. Uchinchi qism «Kuz» — bu oratoriyaning eng quvnoq va shodon qismidir. Muqaddima butun qism kayfiyatini belgilab beradi, u xalq ohanglari asosida ijod qilingan.
Qismning eng ifodali nomerlari Ganna va Lukaning sevgi duetlari hamda ikki — ov qilish va quvnoq bazm xorlaridir. Xordagi ov jarayonini aks ettiruvchi tovushlarni ifodalash ta'sirchanligini alohida ta'kidlab o'tish zarur. To'rtta valtorna ovchi burg'ularining tovushlarini beradi.
Torli cholg'ular forshlaglari itlar xurishini aks ettiradi.
O'n oltitalik passajlar ovchilardan qochib borayotgan ohular yugurishini tasvirlaydi. Uchinchi qismni xalq bayrami, ya'ni hosil yig'ib olingandan keyingi shod-xurramlikni ifodalovchi xor yakunlaydi. Turli ko'rinishlarda takrorlanuvchi xalq ohangi xorning asosi bo'lib xizmat qiladi.
Mazkur mavzu butun sahnaning refrenidir. Dinamika, raqsona xarakterdagi musiqa va xor ovozlarining polifonik shaklda o'zaro uyg'unlashib ketishi shod-xurramlik taassurotini beradi. To'rtinchi qism «Qish». Muqaddimaning musiqasi avvalgi qismlardan keskin farq qiladi. Og'ir sur'at, minor ladi (do minor), xromatizmlar hamda to'xtamlar musiqaga g'amgin va melanxolik kayfiyat baxsh etadi.
Gannaning «Sen aylan charxim, ingichkaroq yigirilsin ip» qo'shig'i o'zgarmaydigan refren (xor partiyasida) va qator variatsiyalashtirilgan kupletlar (Ganna partiyasida)dan tashkil topgan. Gaydn charxning bir xildagi chiyillashini tasvirlab, orkestrda tovush o'xshatmalaridan foydalangan.
Gannaning keyingi «Agar iffatli qizga boy olifta shilqimlik qilsa» qo'shig'i — bu bir boy oshiq yigit yosh dehqon qiziga sevgi izhor qilmoqchi bo'lib, aldanib qolganligi to'g'risidagi kulgili voqeadir. Qo'shiq xalq yo'lida yozilgan va unga ham xor jo'r bo'ladi.
Erkaklar xori (xorning hikoyaga nisbatan luqmalar va kulgi bilan javob berishi) va orkestrda sol major tonalligida fortissimoga II pasaytirilgan bosqich kiritilishi yordamida quvnoq hikoyadan zavqlangan erkaklarning baland qahqahasi taassurotini ta'kidlashi lozim. Oratoriyaning shuhrati shundaki, musiqa matn bilan hamohangdir. Shu bois tomoshabinni dastlabki daqiqalardayoq o'ziga jalb etib, bir ritmda uni tanlashga, oratoriya mazmuniga berilib ketishga undaydi. Obrazlar yakdilligi butun oratoriya davomida ko'zga tashlanib, har bir qahramonning chiqishi o'ziga xos ramziylik kasb etadi. 93
Oratoriyaning so'nggi nomerlari falsafiy xarakterga ega. Simon ariyasi, undan keyingi rechitativ, yakuniy tertset va qo'shaloq xorda insonning bir yil davomidagi tabiat o'zgarishlari kabi kechadigan hayotining mohiyati haqida fikr yuritiladi.
Eslab qolish kerak
• Gaydnning vokal asarlari orasida oratoriyalar muhim o'rin tutadi. • Oratoriyada dasturli izohli orkestr muqaddimasi muhim o'rin egallaydi. t • «Yil fasllari» oratoriyasi Van Sviten librettosiga yozilgan, bu libretto ingliz yozuvchisi Jeyms Tomson sujetiga asoslangan.