|
III. Musobaqa shartlari va baholash mezonlari
Musobaqa besh shart asosida o‘tkaziladi.
Musobaqaning birinchi shartida guruhlar o‘zi tahsil olayotgan ta’lim muassasasida «Yosh qutqaruvchi” ko‘ngillilar klubi uchun yaratilgan sharoitlar, ilmiy ijod va malakaviy izlanishlar uchun mavjud imkoniyatlar, aholining barcha qatlamlarini zilzilalar oqibatida yuzaga kelgan favqulodda vaziyatlarda (tabiiy va texnogen tusdagi) harakat qilishga tayyorlash tizimi samaradorligini oshirish yuzasidan o‘z takliflarini ko‘rgazmali tarzda namoyish etishlari shart.
Guruh kiyimining o‘ziga xosligi, Qurolli Kuchlar harbiy kiyimlari va boshqa tashkilotlarning maxsus kiyimlaridan foydalanilmaganligi, guruhning bosh kiyimi bir turda bo‘lishi, shaxsini tasdiqlovchi ko‘krak guvohnomasi(10×6)ning mavjudligi, shuningdek ko‘krak guvohnomasida musobaqa qatnashchisining ismi, sharifi va familiyasining yozilishi, unda 4×6 sm hajmli fotosurat yopishtirilganligi hamda muhr bilan tasdiqlanganligi – shartni baholashning asosiy mezoni hisoblanadi.
Ushbu shartga 10 daqiqa vaqt beriladi va 5 ballik tizimda baholanadi.
Ikkinchi shartda guruh sardori musobaqaning tashkiliy qo‘mitasi tomonidan guruhlar soniga mos ravishda tayyorlangan maxsus konvertlar ichidan bittasini tanlaydi. Konvertlarda 5 ta savoldan iborat bilet bo‘ladi. Biletdagi savollarning barchasiga guruhning bir nafar ishtirokchisi yoxud har bir savolga guruhning boshqa ishtirokchilari tomonidan javob berilishi mumkin. Bu shartda qo‘shimcha javoblar berilishiga yo‘l qo‘yilmaydi. Shuningdek, guruhlarga hakamlar hay’ati tomonidan 1 ta umumiy savol berilishi mumkin.
Savollarga o‘ylash uchun 2 daqiqa, javob berish uchun 3 daqiqa vaqt ajratiladi va shart 10 ballik tizimda baholanadi.
Musobaqaning uchinchi sharti davomida guruhlar fuqaro muhofazasi va tezkor tibbiy yordam ko‘rsatish bo‘yicha bellashadilar. Ushbu shartda hakamlar hay’ati tomonidan guruhlarga favqulodda vaziyatlar taqdim etiladi. Favqulodda vaziyatlarda tezkorlik va aniqlik bilan harakat qilgan hamda shartni to‘liq bajargan guruh shart g‘olibi hisoblanadi.
Ushbu shart shart 10 ballik tizimda baholanadi.
To‘rtinchi shartda guruhlar favqulodda vaziyatlarda (tabiiy va texnogen tusdagi) harakat qilish jarayonida kerak bo‘lgan jismoniy mashqlar yuzasidan sinovdan o‘tadilar. Ushbu shartda har bir guruhdan bir nafar ishtirokchi qatnashadi. Hakamlar hay’ati tomonidan ishtirokchilarga turli ko‘rinishdagi jismoniy mashqlarni bajarishni vazifa qilib beradi. Eng chaqqon va epchil ishtirokchi (guruh) ushbu shart g‘olibi hisoblanadi.
Ushbu shart 15 ballik tizimda baholanadi.
Beshinchi shartda guruhlarga favqulodda vaziyatlarda (tabiiy va texnogen tusdagi) harakat qilishga tayyorgarliklari sinovdan o‘tkaziladi. Bunda guruh a’zolarining favqulodda vaziyatlar sodir bo‘lganida uni barataraf etish, o‘zga fuqarolarga yordam berish, vaziyatning oldini olish borasidagi harakatlariga yuzasidan har bir guruhga 2 tadan savollar beriladi. Savollarga to‘g‘ri va aniq javob bergan guruh shart g‘olibi hisoblanadi.
Ushbu shart 10 ballik tizimda baholanadi.
Guruhlarning barcha shartlar davomida tezkorligi, epchilligi, mazmundorligi, o‘zini tanishtirish va sahnaviy ko‘rinishlar jarayonida mamlakatimizda aholining barcha qatlamlarini zilzilalar oqibatida yuzaga kelgan favqulodda vaziyatlarda (tabiiy va texnogen tusdagi) harakat qilishga tayyorlash tizimi samaradorligini oshirish yuzasidan olib borilayotgan islohotlar va ular mohiyatini oddiy va xalqchil tarzda ochib berishlari, belgilangan vaqtga qat’iy rioya qilishlari, kiyimi, ijodiy, badiiy hamda voqea hodisalarni xalqchil asosda tayyorlashi – baholashning asosiy mezoni hisoblanadi.
Musobaqadagi savollar O’zbekiston Respublikasi Konstitutsiyasi va qonunlari, O’zbekiston Respublikasining «Aholi va hududlarni tabiiy va texnogen tusdagi favqulodda vaziyatlardan muhofaza qilish to‘g‘risida” va «Fuqaro muhofazasi to‘g‘risida”gi qonunlari, O’zbekiston Respublikasi Vazirlar Mahkamasining qarorlari, shuningdek «Hayot xavfsizligi asoslari” va «Fuqaro muhofazasi” fanlari yuzasidan tuziladi.
Savollar favqulodda vaziyatlar organlari tomonidan tuziladi hamda musobaqa kunidan bir kun avval maxsus konvertga solinib tashkiliy qo‘mita a’zolari ishtirokida muhrlanadi.
Musobaqa shartlarini baholash hamda g‘oliblar va boshqa ishtirokchilarni taqdirlash tashkiliy qo‘mita tomonidan tuziladigan hakamlar hay’ati tomonidan amalga oshiriladi.
Hakamlar hay’ati tarkibiga favqulodda vaziyatlar, xalq ta’limi vazirliklari, o‘rta maxsus, kasb-hunar ta’limi markazi va boshqarmalari mas’ul xodimlari, fan, san’at, adabiyot, ishlab chiqarish sohasida hamda davlat va jamiyat faoliyatining boshqa tarmoqlarida katta amaliy tajribaga ega bo‘lgan mutaxassislar (o‘qituvchilar, amaliyotchilar) kirishi mumkin.
Barcha shartlar bo‘yicha umumiy ballar qo‘shib hisoblaganda eng yuqori ko‘rsatkichga erishgan guruh musobaqaning mutlaq g‘olibi deb topiladi. Yuqori ballar teng bo‘lgan holatda, g‘olib guruhni aniqlash hakamlar hay’ati raisi tomonidan hal etiladi.
Musobaqa davomida hakamlar hay’ati, ko‘rsatilgan baholar uchun izoh bermaydi, shuningdek qarorlar qayta ko‘rib chiqilmaydi hamda muhokama etilmaydi.
Do'stlaringiz bilan baham: |
