Yo‘ldosh Elbek Biring ikki bo‘lsin nima ushlasang

ONА DUOSI
(Yo‘ldosh Elbek)

Biring ikki bo‘lsin nima ushlasang,

Yo‘llaring oq bo‘lsin tog‘lar qoricha.
Sen yorug‘ dunyoda tinch yurar bo‘lsang,
Men duo qilarman umrim boricha.

Ko‘zingda ko‘rmasam alam ranjini,
Boshingda ko‘rmasam tumonat savdo,
Olib bermasang ham olam ganjini,
Sendan onaginang rizodir, rizo!

Hayoting bemaʼno tuyulsa, bolam,

Qorong‘u ko‘rinsa bu ko‘hna dunyo,
Ketsin deb qalbingdan yer yutkur alam,
Yorishsin dunyo, deb aylarman duo.

Yuraging siqilsa takroru takror,

Kenglikka chiqqin-da, aytgin sho‘x o‘lan.
Bu ham hasratingga kelmasa bakor,
Ko‘nglingni bo‘shatgin sheʼr yozmoq bilan.

Qadim ertaklarni tinglash sozdir xo‘p,

Oltin umrlarni unda ko‘rarsan.
Sehrli hayotga mahliyo bo‘lib,
Bebosh o‘ylaringni aldab yurarsan.

Yetishsang, to‘y bersang yurtga mabodo,

Jamshid havas qilsin sening bazmingga.
Noming doston bo‘lib yursang el aro,
Murod-maqsadingga yetsang, bas, menga.

Yomonlar yo‘lini tutmagil minbaʼd,

Fisqu fasodlardan nari bo‘l, to‘xlim.
Olginu oldirma, unib-o‘s, faqat,
Tiriklay go‘rimga kiritma, o‘g‘lim!