Yigirish texnologiyasi

6-mavzu. Titish-tarashdan ajraladigan chiqindilar miqdori va

sifatini tekshirish

Reja

1. Titish-tarashdan ajraladigan chiqindilari.

2. Chiqindilarni sifatini aniqlash.

Chiqindilar va qaytimlarni (obratы) yig‘ish va ularni saralash ishlari ishchilar tomonidan amalga oshiriladi. Bu ish Davlat standarti talablariga javob berishi kerak. Agarda chiqindi va qaytimlar standartlari aralashtirilib yuborilgan bo‘lsa, yana qaytadan ajratiladi. Chiqindilarni standartlarga to‘g‘ri ajratish uchun quyidagilarga ahamiyat berish kerak:

-titish-tozalash sexida paxta bo‘laklari va qiyqimlari ifloslanmasligiga, shuningdek tugunaklar bilan momiqlar aralashib ketmasligiga;

-tarash sexida qabul qilingan barabandan ajralgan momiqli tugunaklarni bosh va ajratish barabanidan ajralgan momiqqa aralashishi, shuningdek, baraban va shlyapkalar tarandilarini aralashib ketishiga yo‘l qo‘ymaslik kerak.

Chiqindi bo‘limining xodimlari chiqindini etalonga solishtirib qabul qilishlari kerak. Bu vazifa to‘g‘ri bajarilayotganini tekshirish smena chiqindi qabul qiluvchisiga yuklatiladi. Chiqindining sifati texnik nazorat bo‘limi masteri va sex boshlig‘i tomonidan nazorat qilib boriladi. Chiqindilar joylangan vaqtda ishchilar har bir joydan namuna olib qolishi va etalon bilan solishtirishlari kerak bo‘ladi. Har bir toy chiqindida texnik nazorat bo‘limi belgisi bo‘lishi kerak.