Yer to‘g‘risidagi qonun hujjatlarining asosiy vazifalari. 2 Yer fondi toifalari. Yerlarni toifalarga bo‘lish va bir toifadan boshqasiga o‘tkazish

73-modda. Sog‘lomlashtirish maqsadlariga mo‘ljallangan yerlar
Sog‘lomlashtirish maqsadlariga mo‘ljallangan yerlar jumlasiga tabiiy shifobaxsh omillarga ega bo‘lgan, kasalliklarning oldini olish va davolashni tashkil etish uchun qulay, belgilangan tartibda tegishli muassasalar va tashkilotlarga doimiy foydalanishga berilgan yer uchastkalari kiradi.
Aholining davolanishi va dam olishi, shuningdek tabiiy shifobaxsh omillarni muhofaza qilishning zarur shart-sharoitini ta’minlash uchun sog‘lomlashtirish maqsadlariga mo‘ljallangan yerlarda sanitariya muhofazasi okruglari belgilanadi. Ana shu okruglar doirasida tabiiy shifobaxsh xossalarni va aholining dam olishi uchun qulay sharoitni muhofaza qilishga zid faoliyat taqiqlanadi.
Sog‘lomlashtirish maqsadlariga mo‘ljallangan yerlardan foydalanish hamda sanitariya muhofazasi okruglarini belgilash tartibi qonun hujjatlari bilan belgilanadi.
74-modda. Rekreatsiya maqsadlariga mo‘ljallangan yerlar
Rekreatsiya maqsadlariga mo‘ljallangan yerlar aholining ommaviy dam olishi va turizmni tashkil etish uchun tegishli muassasalar va tashkilotlarga berilgan yerlardir.
Rekreatsiya maqsadlariga mo‘ljallangan yerlarda ulardan belgilangan maqsadda foydalanishga xalaqit beradigan faoliyat taqiqlanadi.
Rekreatsiya maqsadlariga mo‘ljallangan yerlardan foydalanish tartibi qonun hujjatlari bilan belgilanadi.
75-modda. Tarixiy-madaniy ahamiyatga molik yerlar
Tarixiy-madaniy ahamiyatga molik yerlar jumlasiga tarixiy-madaniy qo‘riqxonalar, memorial bog‘lar, mozorlar, arxeologiya, tarix va madaniyat yodgorliklarining tegishli muassasalar va tashkilotlarga doimiy foydalanishga berilgan yerlari kiradi. Bu yerlarda ularning belgilangan maqsadiga zid bo‘lgan har qanday faoliyat taqiqlanadi.
Tarix va madaniyat yodgorliklari atrofida muhofaza zonalari va binolar qurishni tartibga solish zonalari belgilanadi.
Tarixiy-madaniy ahamiyatga molik yerlarni ajratish va bunday yerlardan foydalanish, ular atrofida muhofaza zonalari hamda binolar qurishni tartibga solish zonalarini belgilash tartibi qonun hujjatlari bilan belgilanadi.