10- MAVZU. TURKISTONDA SOVETLAR HUKMRONLIGINING O’RNATILISHI. SOVETLAR OLIB BORGAN MUSTABID SIYoSAT 1-§. Turkistonda sovet hokimiyatining o’rnatilishi. 1917 yil 27 fevralda Petrogradda demokratik inqilob g’alaba qozonib, Rossiya imperatori Nikolay II taxtdan ag’darib tashlandi. Bu inqilob Turkiston o’lkasiga ham o’z tahsirini o’tkazdi. Xususan, Turkiston jadidlari, ziyolilari va islom ulamolarining tashabbuslari bilan 1917 yil martida “SHo’roi Islomiya”, 1917 yil iyunida “ SHo’roi Ulamo”, 1917 yil iyulida “Turk Adami Markaziyati” (“Turk federalistlari partiyasi”), 1917 yil sentyabrda “Ittifoqi muslimin” kabi siyosiy partiyalar tuzildi.
1917 yil 7 aprelda Petrograddagi Muvaqqat hukumat qarori bilan N.N. SHchepkin raisligida Muvaqqat hukumatning Turkiston komiteti tuzildi. Ammo, 1917 yilning aprel va sentyabr oylarida bo’lib o’tgan Butunturkiston musulmonlarining I va II qurultoylari Turkiston Muxtoriyati tashkil etish g’oyasini ilgari surib, hokimiyatni ishchi, soldat va dehqon deputatlari Sovetlariga berishga qarshi chiqdi. 1917 yil 20 sentyabrida Toshkentda bo’lib o’tgan Turkiston va Qozog’iston musulmonlarining qurultoyidagi asosiy masala Turkiston o’lkasining siyosiy tuzumini belgilash edi. O’sha davrdagi manba tili bilan aytganda “Qurultoy... Turkiston Muxtoriyatini tayin etishga jazm qildi”. Qurultoy muxtoriyatga “Turkiston Federativ Respublikasi” degan nomni quyib, parlament respublikasi asosida tuzilajak bo’lg’usi davlat tuzumining bosh tamoyil va mehyorlarini belgilab berdi. Afsuski, bu rejalar amalga oshmadi.
1917 yil 25 oktyabrda (yangi sana bilan 7 noyabrda) V.I.Lenin boshchiligidagi bolg’sheviklar (kommunistlar) Petrogradda Muvaqqat hukumatni ag’darib tashlab, hokimiyatni zo’ravonlik bilan egalladilar. Toshkent shahrida 28 oktyabrda boshlangan qurolli to’qnashuvlar 1 noyabrda Muvaqqat hukumatning Turkiston qo’mitasini qamoqqa olish bilan yakunlandi. Turkiston bolg’sheviklari o’lkadagi butun hokimiyatni qo’lga olish uchun shafqatsiz kurashga kirishdilar. Demokratik kuchlar esa bu holga qathiy norozilik bildirdilar.
1917 yil 13-17noyabr kunlari Toshkentda bo’lib o’tgan shahar o’z-o’zini boshqarish tashkilotlarining Turkiston o’lka shezdi qatnashchilari hokimiyatni to’laligicha bolg’sheviklar qo’liga o’tishiga keskin qarshilik ko’rsatishdi. Shezd hokimiyat masalasiga oid quyidagi rezolyutsiyani qabul qildi: “ Turkistonda hokimiyatni ishchi, dehqon va soldat deputatlari qo’liga o’tishi bilan hokimiyat masalasidagi munozara shunday xulosaga keldi:
1.Rossiya inqilobi ko’targan xalqning ozodligi, tengligi, do’stligi shiorlari ostida Turkiston aholisining 98 foizini tashkil etuvchi, 10 mln. sonli musulmon aholisi milliy-madaniy o’z-o’zini boshqarishning barcha huquqlariga ega;
2.Musulmonlarining o’z taqdirini o’zi belgilash va umuminsoniy taraqqiyotiga bo’lgan qiziqishi Qurhon va SHariat qonunlaridan o’zgacha bo’lishi mumkin emas. Musulmonlar inqilob natijasida qo’lga kiritgan huquqlarni amalga oshirar ekan Rossiyadagi siyosiy partiyalarning birontasi tarkibida faoliyat ko’rsatishi va ularning partiyaviy kurashlarida qatnashishi mumkin emas. Lekin, Rossiya fuqarolari bilan umumiy jamiyat manfaatlarini hisobga olib mamalakatni Tahsis majlisiga olib boruvchi hokimiyatni qo’llab-quvvatlashi maqsadga muvofiqdir;
3.Butun Rossiya doirasida hokimiyat qanday tuzilishidan qathiy nazar musulmonlar o’z taqdirini o’zi belgilash huquqlarini mahalliy sharoitni yaxshi bilgan, musulmonlarning urf-odatlari va yashash sharoitlari bilan yaxshi tanish bo’lgan, xalqning hohish irodasiga ko’ra yangicha hayot tartiblarini joriy qila oladigan kishilardan iborat mahalliy hokimiyat orqali amalga oshirishlari mumkin. SHuning uchun mahalliy hokimiyat birinchi navbatda musulmon vakillaridan, mahlum miqdorda boshqa siyosiy tashkilotlarda faoliyat ko’rsatuvchi, lekin musulmonlarga xayrixoh bo’lgan vakillardan tashkil topishi kerak;
4.Hokimiyatni mahalliy aholi manfaatlari uchun tasodifiy va begona bo’lgan harbiylar, ishchilar va dehqon(krestg’yan)larning mayda guruhlari qo’lidagina to’planib qolishi demokratik printsiplarga mos emas va mahalliy aholini o’z taqdirini o’zi belgilash yo’lidagi erkin harakatlariga kafolat bera olmayd.
1917 yil 15-22 oktyabr kunlari Toshkent shahrida bo’lib o’tgan O’lka ishchi, soldat va dehqon deputatlari Sovetlarining III shezdida 15 kishidan iborat hukumat- .Turkiston o’lkasi Xalq Komissarlari Soveti tuzildi. Unda 8 ta o’rin so’l eserlarga, 7 ta o’rin bolg’sheviklar bilan maksimalistlarga berilib, hukumat tarkibiga tub aholi vakillaridan bitta ham vakil kiritilmadi. XKS raisi lavozimini F.Kolesov egalladi.
Turkistonda hokimiyat bolg’sheviklar qo’liga o’tishi bilan o’lkada Muvaqqat hukumatning barcha bo’g’inlari tugatilib, o’rniga avvalo jazo organlari va sovet boshqaruv tizimi o’rnatildi.
Turkiston XKS 1917 yil 28 noyabrda o’lkada qizil gvardiya bo’linmalarini tuzish haqida qaror qabul qiladi. Bu bo’linmalar Sovet tuzumi va bolg’sheviklarga qarshi ko’tarilgan dastlabki ongli chiqishlarni bostirishda faol ishtirok etdi.
Turkiston XKS 1917 yil oxirlarida o’z qarori bilan “SHo’roi islomiya” va boshqa mahalliy demokratik tashkilotlarni tarqatib yubordi. Bu tashkilotlarning rahbarlari keyinchalik Turkiston Muxtoriyati hukumatiga qo’shildilar, ayrimlari istiqlolchilik harakatiga g’oyaviy rahnamolik qildilar. “SHo’roi Ulamo” tashkilotining Toshkent sho’basi faqat 1918 yil 13 mayda yopib qo’yildi.
Turkiston o’lkasi XKS o’zining tuzilishi va boshqaruv apparatlari jihatidan tubdan farqlanuvchi hukumat edi. Turkiston XKS tarkibiga kirgan 15 ta komissarlik o’lkadagi boshqaruv ishlarini butunlay qamrab olgan bo’lib, boshqaruv tizimining farqli tomoni shunda ediki, Turkiston XKS tashkil topgan paytdayoq Rossiyadagi Markaziy hukumatni tan oldi. CHunonchi, Turkiston XKS raisi F.Kolesov Petrograddagi XKS nomiga yuborgan telegrammada quyidagicha tahkidlagan edi: “Komissarlar Soveti o’z oldiga sizning hamma dekretlaringizni amalga oshirish vazifasini qo’ydi... Bizning to’la-to’kis qo’llab quvvatlashimizni hisobga olishingizni so’raymiz”.
Tadqiqotchilarning (Q.Rajabov, M. Haydarov) fikricha, Turkiston o’lkasi yangi hukumati o’sha kunning o’zida (1917y. 23 noyabr-E.B.) aholiga qilgan murojaatida ham o’zining asl maqsadlarini yashirib o’tirmadi. Murojaatda ham telegrammada bo’lgani kabi quyidagilarga alohida urg’u berilgan edi: “Xalq Komissarlari Soveti markaziy hokimiyatning barcha dekretlarini og’ishmay amalga oshiradi va o’z faoliyatida shezdning ...qarorlariga amal qiladi. Bu topshiriqlarni bajarish yo’lidagi har qanday qarshilik sovetlar tomonidan keskin choralar ko’rish bilan kutib olinadi”.
Tadqiqotchilar to’g’ri tahkidlaganlaridek, Turkiston XKS o’z faoliyatining birinchi kunlaridan boshlab sovet siyosatini amalga oshirishga, Turkiston o’lkasida sovet hokimiyatini mustahkamlashga qattiq va astoydil kirishdi. Barcha mahalliy sovetlarga zudlik bilan qizil gvardiya tuzishga kirishish taklif qilindi. O’lka komissarligi tarkibida bo’lgan va boshqaruvda asosiy rol o’ynaydigan harbiy, tashqi savdo, shuningdek, pochta, telegraf va temir yo’llar boshqaruvi masalalari butunlay Rossiyadagi tegishli idoralarga berib qo’yilishi oqibatida Turkiston XKS ijrochi organga aylanib qoldi. Markazdan yuborilgan barcha mashul xodimlar, turli komissiya va tashkilotlar o’z siyosatlarini qo’g’irchoq organga aylangan o’lka XKS orqali yuritdilar.
