Xii. Harakatlanish tezligi va oraliq masofa

XII. HARAKATLANISh TEZLIGI VA ORALIQ MASOFA
12.1. Haydovchi belgilangan tezlikni oshirmasligi, harakatning serqatnovligi, transport vositasi va yukning xususiyati, holati, yo‘l, ob-havo sharoiti, shuningdek yo‘nalishdagi ko‘rinishni hisobga olgan holda harakatlanishi kerak.
Haydovchi biror xavf yoki to‘siqni aniqlaganda transport vositasining tezligini, zarur bo‘lsa tuxtagunga qadar kamaytirishi, to‘siqni boshqa harakat ishtirokchilari uchun xavfsiz tarzda aylanib o‘tishi hamda uni bartaraf etish chorasini ko‘rishi kerak.
12.2 Aholi yashaydigan joylarda barcha transport vositalarining tezligi soatiga 70 km dan oshmasligi kerak.
12.3 Aholi yashamaydigan joylarda:
— yengil va to‘la vazni 3,5 tonnadan oshmaydigan yuk avtomobillari tezlikni soatiga 100 km dan;
— barcha turdagi avtobuslar, tirkamali yengil va to‘la vazni 3,5 tonnadan ortiq bo‘lgan yuk avtomobillari tezlikni soatiga 90 km dan;
— mototsikl haydovchilariga tezlikni soatiga 70 km dan oshirmasdan harakatlanishga ruxsat etiladi.
12.4. Haydovchilarga quyidagilar taqiqlanadi:
— tezlikni mazkur transport vositasining texnik tavsifnomasida ko‘rsatilgan me’yordan oshirish;
— transport vositasiga o‘rnatilgan taniqlik belgisida ko‘rsatilgan tezlikdan oshirish;
— besabab juda sekin yurib, boshqa transport vositalarining harakatlanishiga xalaqit berish;
— zaruratsiz transportni keskin to‘xtatish.
12.5 Haydovchi, oldindagi transport vositasi keskin to‘xtaganda, urilib ketmaslikni kafolatlovchi oraliq masofani va xavfsizlikni ta’minlaydigan yonlama oraliq masofani ta’minlamog‘i shart.
12.6 Tezlikni soatiga 50 km dan oshirish mumkin bo‘lmagan transport vositasining, shuningdek to‘la vazni 12 tonnadan ortiq bo‘lgan transport vositasining haydovchisi aholi yashamaydigan joylardagi yo‘llarda harakatlanganda oraliq masofani shunday saqlashi kerakki, quvib o‘tayotgan boshqa transport vositasi yo‘lning o‘ng tomoniga bemalol qayta tizila olsin. Agar haydovchi quvib o‘tishga tayyorlanayotgan yoki harakat serqatnov bo‘lsa, yuqoridagi talab o‘z kuchini yo‘qotadi.

XIII. QUVIB O‘TISh VA QARAMA-QARShI HARAKATLANISh
13.1. Haydovchi quvib o‘tishni boshlashdan oldin:
— orqada harakatlanayotgan haydovchining uni quvib o‘tishiga harakat qilmayotganiga;
— oldinda ketayotgan transport vositasi haydovchisining chapga burilishga (qayta tizilishga) ogohlantirish ishorasini bermaganligiga;
— quvib o‘tish vaqtida ro‘paradan kelayotgan transport vositasiga to‘sqinlik qilmasligiga;
— quvib o‘tishni tugallaganda, quvib o‘tilayotgan transport vositasiga to‘sqinlik qilmasdan qayta tizila olishiga ishonch hosil qilishi kerak.
13.2. Quvib o‘tilayotgan transport vositasi haydovchisining tezlikni oshirib yoki boshqa xil harakatlar bilan quvib o‘tayotgan haydovchiga to‘sqinlik qilishi taqiqlanadi.
13.3. Quyidagi hollarda quvib o‘tish taqiqlanadi:
— kesib o‘tilayotgan yo‘lga nisbatan asosiy bo‘lgan yo‘llarda quvib o‘tish hollaridan tashqari, barcha chorrahalarda;
— temir yo‘l kesishmasida va ularga 100 metrdan kam masofa qolganda;
— tepalikning yuqori qismida, keskin burilishlarda va yo‘lning ko‘rinishi cheklangan boshqa joylarida.
13.4. Aholi yashamaydigan joylarda yo‘llarning kengligi, holati, sekin harakatlanayotgan katta hajmli yoki ma’lum tezlikka amal qilayotgan transport vositasini quvib o‘tishga xalaqit bersa, uning haydovchisi mumkin qadar yo‘lning o‘ng tomonidan harakatlanishi, zarur hollarda esa to‘xtab, orqada to‘planib qolgan transport vositalarini o‘tkazib yuborishi kerak.
13.5. Agar qarama-qarshi harakatlanishdagi yo‘lning biror bo‘lagida to‘siq bo‘lsa, to‘siq o‘z tomonida bo‘lgan haydovchi yo‘l berishi kerak.
Tegishli belgilar qo‘yilgan tepaliklarda to‘siq bo‘lsa, uning qaysi tomondaligidan qat’i nazar, nishablik tomonga qarab harakatlanayotgan transport vositasining haydovchisi yo‘l berishi kerak.