М у н д а р и ж а I боб. Металларнинг кристалл тузилиши ва кристалланиш поцесси

3- §. ФАЗАЛАР ЗОИДАСИ

1873—1878 йилларда Д. Гиббс кўп фазали гетероген (кўп жинсли) системаларнинг мувозанатини ифодалаш учун, термодинамиканинг биринчи ва иккинчи қонунларига асосланиб, фазалар қоидаси деб аталадиган бир қонунни топди.

Биз фаза, система, компонент ва эркинлик даражалари сони (вариантлик) нима эканлигини билиб олдик. Энди фазалар қоидасини таърифлащга ўтсак бўлади.
Мувозанат ҳолатида турган ҳар қандай системанинг фазалари сони, компонентлари сони ва эркинлик даражалари сони орасидаги боғланишни кўрсатувчи математик ифода фазалар қоидаси, бошқача қилиб айтганда, Гиббс конуни деб аталади.
Фазалар қоидасини келтириб чиқариш учун мувозанатда турган системанинг фазалари сонини Ф ҳарфи билан, компонентлари сонини К ҳарфи билан, эркинлик даражалари сонини С ҳарфи билан белгилаймиз.
Икки компонентли фазанинг таркибини билиш учун компонентлардан бирининг процент билан ифодаланган миқдорини билиш кифоя 100% дан биринчи компонентнинг процент билан ифодаланган миқдори айрилса, иккинчи компонентнинг миқдори чиқади. Бинобарин, бирор фазадаги компонентлар сони К бўлса, фазанинг таркиби (К—1) компонентнинг концентрацияси билан ифодаланади. Фазадаги компонентлардан бирининг концентрациясини билиш учун қолган барча компонентлар концентрацияларининг йиғиндисини 100 дан айириш керак.
Демак, ҳар қайси фазада концентрация параметрлари сони (К—1) бўлади. Системанинг барча фазаларидаги концентрация параметрлари сони (К—1) Ф га тенг. Бунга яна икки параметрни (факторни) — босим билан температурани қўшсак, системадаги барча параметрлар сони чиқади:
(К — 1) Ф+2.
Мувозанатда турган система учун ҳар қайси компонентнинг барча фазалардаги эркин энергия даражаси (термодинамик потенциали) бир хил бўлиши керак. Буни қуйидаги тенгламалар системаси билан ифодалаймиз (р — эркин энергия даражаси):